Shymkent qalasyndaǵy Jastar resýrstyq ortalyǵynda «QDigitalInform» semınary ótti. Jýrnalıstıkanyń, onyń ishinde qazaq tildi buqaralyq aqparat quraldarynyń sapasyn arttyrýǵa septigin tıgizýdi, «Sıfrly Qazaqstan» baǵdarlamasyn dáripteýdi maqsat etken joba sheńberinde ótken is-sharaǵa qatysýshylar, ıaǵnı jańa tehnologııalar zamanynda paıda bolǵan jańashyldyqtardy ıgerýge qyzyǵýshylyq tanytqandar kóp boldy.
«Samruk-Kazyna Trust» áleýmettik jobalardy damytý qorynyń qoldaýymen Kommýnıkatıvtik bastamalar jáne strategııalar qory uıymdastyrǵan semınardyń birinshi kúninde qatysýshylar elektrondy úkimet pen elektrondy memlekettik qyzmettiń sıfrly múmkindikterimen tanyssa, ekinshi kúni blokcheın tehnologııasy týraly tereń maǵlumat aldy. Sondaı-aq qatysýshylarǵa úlestirý tiziliminiń tehnologııasy nemese derekqordyń jekelený teorııasyn meńgerý múmkindigi berildi. Semınarda blokcheın tehnologııasyn memlekettik basqarý men bıznes salasynda paıdalaný ádisteri týraly baıandaǵan Shymkent qalasy boıynsha aqparattyq-tehnologııalyq ortalyǵynyń Aqparattyq júıelerdi súıemeldeý basqarmasynyń bas ınjeneri Marjan Sábden elimizde elektrondy qujat aınalymy júıesi erekshe ról atqaratynyn, barlyq deńgeıdegi memlekettik basqarýdyń jan-jaqty ashyqtyǵy men baqylaýyn qalyptastyrýdaǵy mańyzdy faktor ekenin atap ótti. Al basqarmanyń bas mamany Erqulan Barmaǵanbetov otandastarymyzdyń kıber keńistiktegi baǵyty men deńgeıi týraly baıandady.
Semınar sońynda qatysýshylar alǵan bilimderin bekitý maqsatynda shaǵyn jobalar jasap, spıkerlerdiń praktıkalyq tapsyrmalaryn oryndady.
Ǵalymjan ELShIBAI,
«Egemen Qazaqstan»
ShYMKENT
