Jıyndy ashqan Jazýshylar odaǵy basqarmasynyń tóraǵasy U.Esdáýletov Ǵafańa qatysty ónegeli estelikterdiń basyn qaıyrdy. Aqseleýli dalada shalqalap jatqan Ǵafań: «Aqseleý! Bıdaıǵa oryn bermeshi!» dep jalbarynypty. Tyńnyń oıranyn eskertkeni ǵoı...
Aqyn E.Raýshanovtyń baıandamasy mazmunymen erekshelendi. Ǵ.Músirepov ómirden ótkende Ǵafań: «Qazaq ádebıetiniń bir dáýiri aıaqtaldy, oısyrady», depti. Osy taqylettes aýyr oılary Qaıyrbekovpen qoshtasqanda Myrzalıev, Myrzalıevti aqyrǵy saparǵa shyǵaryp salǵanda T.Moldaǵalıev qaıtalaǵan eken. Netken aıanyshty ári qasterli úndestikter edi...
Aqyn R.Nııazbekov: «Ǵafań jeńilgenderdi jaqtaıtyn, retsiz jeńgenderdi dattaıtyn», dep ádilettiligin órkeshtendirdi. Sondaı-aq «Ustaǵanda hrýstaldy, jaǵdaıym durystaldy», sekildi ázilmen órilgen tapqyrlyǵynan birshama shýmaq órip kúlkige bóktirdi.
Memlekettik syılyqtyń laýreaty, sáýletshi Á.Tátiǵulov Ǵafańnyń adamgershiligine qatysty sóz órbitti. Al akademık Saılaý Baızaqov óziniń úılený toıyn osydan 57 jyl buryn Ǵafań júrgizgenin eske túsirdi. Onyń inisi, akademık Sábıt Qyzbeldegi mektep muǵalimi, bozbala aqyn Ǵafýdyń óleń oqyp, dombyramen án salǵanda bujyrlaý betin mańdaıyna basa tartqan oramaly jartylaı jaýyp, kólegeılep turatynyn, munyń ózi kóz, til tımeýdiń qamy ekenin qyzyqty etip baıandady.
Qostanaı oblystyq mádenıet basqarmasynyń bastyǵy E.Qalmaqov oblys ákiminiń quttyqtaý hatyn oqyp, aqynnyń jary Bádesh pen uly Baqytqa syı-sııapat jasady. Al aqynnyń týǵan ólkesinen, Jangeldın aýdandyq máslıhatynyń hatshysy S.Nurǵazın ekeýine aýdan 90 jyldyǵynyń merekelik tósbelgisin tabys etti.
Ǵ.Qaıyrbekovtiń qurmetine arnalǵan jyr músháırasynyń qorytyndysyn Jazýshylar odaǵy basqarma tóraǵasynyń orynbasary B.Jaqyp jarııa etip, bas júldeger Á.Shegebaı men birinshi oryn alǵan M.Qunypııaqyzy óleńderin oqydy.
Qostanaılyq aqyn S.Ospanov jýyrda Tatarstanǵa delegasııa quramynda barǵanda qonaqtardy Ǵafańnyń «Ana týraly jyr» ánimen qarsy alǵanyn aıtqanda, Bádesh apa bastap, zal qostap osy bir qudiretti áýendi áýeletip jiberdi...
Mereıtoıdyń keremet káde-syıy Ǵ.Qaıyrbekovtiń prozalyq tańdamaly shyǵarmalarynyń úsh tomdyǵynyń taratylýy edi.
Keshti tapqyrlyqpen júrgizgen, aqyn B.Bedelhan: «Búgin qalanyń barlyq kafeleri men meıramhanalarynda baıaǵydaǵy Ǵafań otyrǵanyndaı bop, onyń qurmetine dastarqan jaıýly tur», dep astarly ázil tastady.
Biz de óz kezeginde: «Ǵafańdy saǵynsańyzdar, osy zalda ádeıi Astanadan kelip otyrǵan, ózinen eki jas kishi týǵan qaryndasy Kúlásh apaıdyń quıyp qoıǵandaı myna túrine telmirińizdershi!» dep ol kisini ornynan kóterdik.
Qaısar ÁLIM
ALMATY
