Zertteldi. Zerdelendi. Atyraýda ótken «Rýhanı jańǵyrý: Máńgilik el murattary» halyqaralyq forýmy da Murat aqynnyń shyǵarmashylyǵyna arnaldy.
Oblystyq ákimdik pen H.Dosmuhamedov atyndaǵy Atyraý memlekettik ýnıversıteti uıymdastyrǵan «Murat Móńkeuly murasy jáne týǵan jer ıdeıasy» atty respýblıkalyq ǵylymı-teorııalyq konferensııaǵa elimizge belgili ǵalymdar, ádebıet zertteýshileri, aqyn-jazýshylar qatysty. «Tarıhta erekshe iz qaldyrǵan tulǵalardy dáriptep, nasıhattaý – bizge paryz. Bul turǵyda Murat Móńkeulynyń aıshyqty izi bar, – dep atap ótti oblys ákimi Nurlan Noǵaev. – Onyń jyr júırigi, aıtysker aqyn, keń tynysty jyrshy, el men jer tarıhyn jetik bilgen shejireshi bolǵany barshaǵa belgili. Tolǵaý-jyrlary, óleń-termeleri halqymyzdyń baǵaly rýhanı qazynasyna aınaldy. El-jurtqa Murat arqyly jetken Mahambet jyrlary ádebıetimizdiń altyn qoryna endi. Táýelsizdikti ańsaǵan Murat aqyn – el úshin basyn báıgege tikken qaıratker. Jyr jampozynyń taǵylymdy murasy ǵasyrdan ǵasyrǵa jalǵasa bereri anyq».
Konferensııada L.N.Gýmılev atyndaǵy Eýrazııa ulttyq ýnıversıteti qazaq ádebıeti kafedrasynyń meńgerýshisi, akademık, Memlekettik syılyqtyń laýreaty Seıit Qasqabasov «Murat Móńkeuly murasyndaǵy folklorlyq dástúrlerdiń el tarıhymen úndestigi» taqyrybynda baıandama jasady. Sh.Shaıahmetov atyndaǵy «Til-qazyna» ulttyq ǵylymı-praktıkalyq ortalyǵynyń dırektory, L.N.Gýmılev atyndaǵy Eýrazııa ulttyq ýnıversıteti fılosofııa kafedrasynyń meńgerýshisi, akademık, fılosofııa ǵylymdarynyń doktory, professor Ǵarıfolla Esim «Murat Móńkeuly jáne «týǵan jer» uǵymynyń fılosofııasy» jaıly aıta kelip, «Murat pen Abaı – zamany bir, zary bir, muńdas oıshyldar. Ekeýine de ortaq uǵym – zaman. Olardyń ǵumyr keshken zamany – qıly zaman. Qıly zaman – qazaq halqynyń basynan bıligi ketken zaman. Sol zamannyń sıpatyn Murat Móńkeulynyń «Úsh qııanynan» taba alamyz. Murat jyraýdyń bul tolǵaýyn mektepterde mindetti túrde oqytý qajet» dep atap ótti.
Ulttyq ǵylym akademııasynyń korrespondent-múshesi, fılologııa ǵylymdarynyń doktory, professor Baýyrjan Omarov, L.N.Gýmılev atyndaǵy Eýrazııa ulttyq ýnıversıtetiniń prorektory, akademık, fılologııa ǵylymdarynyń doktory, professor Dıhan Qamzabekuly, halyqaralyq «Qazaq tili» qoǵamynyń vıse-prezıdenti, «Arys» qorynyń dırektory, fılologııa ǵylymdarynyń doktory Ǵarıfolla Ánes, H.Dosmuhamedov atyndaǵy Atyraý memlekettik ýnıversıtetiniń rektory Abzal Taltenov jáne ýnıversıtettiń «Atyraý ólkesiniń tarıhy, arheologııasy men etnografııasy ortalyǵynyń» dırektory, tarıh ǵylymdarynyń doktory Saıfýlla Sapanovtar Murat aqyn shyǵarmashylyǵyn jan-jaqty zerdelegen oılaryn ortaǵa saldy.
Konferensııamen qatar «Baıtaqtan ozyp, báıge alǵan» atty halyqaralyq aqyndar aıtysy da uıymdastyryldy. Qytaı men Mońǵolııadan jáne elimizdiń ár óńirinen kelgen 20 aqyn eki kún boıy jyr kórigin qyzdyrdy.
– Bul aıtystyń ereksheligi, elimizdegi eń júırik degen aqyndardyń birazy qatysty, – deıdi Qazaqstannyń eńbek sińirgen qaıratkeri Júrsin Erman. –Murat Móńkeulynyń ómiri men shyǵarmashylyǵyn kesteli sózben kórkemdedi.
Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda oblys ákimdiginiń qoldaýymen uıymdastyrylǵan aıtysqa halyq ártisi, Memlekettik syılyq ıegeri, Qazaqstannyń Eńbek Eri Asanáli Áshimov bastaǵan qazylar alqasy tórelik jasady. Jyr alamanynyń bas júldesine belgilengen 2 mln teńgeni batysqazaqstandyq Jansaıa Mýsına jeńip aldy.
Baqytgúl BABASh,
«Egemen Qazaqstan»
ATYRAÝ
