Keńes Tóraǵasy – Parlament Senatynyń Halyqaralyq ister, qorǵanys jáne qaýipsizdik komıtetiniń tóraǵasy Darıǵa Nazarbaeva óz sózinde «EAEO-ty nyǵaıtý maqsatynda júıeli túrdegi turaqty jumystyń, jalpy jáne ulttyq múddege saı kelisimderdi múltiksiz oryndaýdyń, uıymnyń quqyqtyq negizin odan ári jetildirýdiń, anyqtalǵan olqylyqtar men kemshilikterge jyldam jaýap berýdiń mańyzdylyǵyn atap ótti.
«Ekonomıkalyq dıplomatııany kúsheıtip, EAEO elderiniń naryǵynda ulttyq bıznes múddelerin belsendi qorǵaý qajet», - dedi D.Nazarbaeva.
Syrtqy ister mınıstriniń orynbasary Ǵalymjan Qoıshybaev «Eýrazııalyq ekonomıkalyq odaqtyń jaǵdaıy men damý perspektıvalary» taqyrybynda baıandama jasady. Syrtqy saıası vedomstvo ókili Eýrazııalyq ekonomıkalyq odaq aıasynda egemendik, teńdik, teń quqyqtyq jáne taraptardyń ulttyq múddelerin eskerý prınsıpi qatań qamtamasyz etilgenin atap ótti. «Shart barlyq deńgeılerde strategııalyq sheshimderdi qabyldaýda naqty konsensýstyq mehanızmdi qamtıdy, bul basqa da sharalarmen qatar kez kelgen memlekettiń ústemdik etý múmkindigin joqqa shyǵarady. Bolashaqta Eýrazııalyq ekonomıkalyq odaq jeke tartymdy alań bola alady, ol tolyqqandy. Sonymen qatar, biz aımaqtyq aýqymdy jobalar boıynsha seriktes bola alamyz. Bul úshin Memleket basshysynyń úlken jáne ekonomıkalyq turǵydan kúshti Eýrazııany qurý ıdeıasyna jetý maqsatynda Eýroodaqpen, Qytaımen jáne basqa eldermen tyǵyz ári ózara tıimdi qatynastardy damytý qajet», - dep atap ótti Ǵ.Koıshybaev.
Azamattyq qoǵam tarapynan Qazaqstan Respýblıkasy Prezıdenti janyndaǵy Qazaqstan strategııalyq zertteýler ınstıtýtynyń bas ǵylymı qyzmetkeri Vıacheslav Dodonov qosymsha baıandama jasady. Sarapshy Reseı men Batystyń teketiresi Qazaqstan sarapshylary arasynda elimizdiń uıymǵa músheliginiń qısyndylyǵy týraly pikirtalas týǵyzǵanyn atap ótti. V.Dodonov, «eki eldiń ıntegrasııalyq birlestikterdegi birikken músheliginiń bolý bolmaýyna qaramastan, Reseı Qazaqstannyń strategııalyq jáne jetekshi ekonomıkalyq seriktesi bolǵan jáne bolyp qala beredi – bul jaǵdaı Kedendik odaqtan buryn qalyptasqan. Al EAEO-tyń joǵarǵy organdarynda múshelik Qazaqstanǵa kórshi eldermen ekonomıkalyq seriktestikte osy organdardyń jumys sheńberinde óz múddesin qorǵaýǵa múmkindik beredi», - dep atap kórsetti.
Qazaqstannan basqa Eýrazııalyq ekonomıkalyq odaqqa Armenııa, Belarýs, Qyrǵyzstan jáne Reseı múshe ekendigin eske salamyz.
Qazaqstan Respýblıkasy Syrtqy ister mınıstrligi qyzmetiniń máseleleri jónindegi Qoǵamdyq keńestiń kelesi otyrysy 2019 jyldyń naýryz aıyna josparlanǵan.
