Qala ákiminiń orynbasary Arman Qyryqbaev Elbasy Joldaýynda bilim salasynyń naqty kórinis tapqandyǵyn aıta kele Almatydaǵy bilim júıesiniń barysyna toqtaldy. Qala ákimdiginiń málimetinshe sońǵy bes jyl ishinde bilim salasyn qarjylandyrý 27 mlrd teńgege ósken. Aldaǵy kezeńderde mektep jasyna deıingi jáne jalpy orta bilim berýdiń sapasyn arttyrý maqsatynda bilim júıesi qyzmetkerleriniń biliktiligin kóterýge baılanysty PIZA, SAT, AST halyqaralyq standarttarǵa kóshýge qatysty sharalar jospary bekitiletin bolady.
Al Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty qalasy boıynsha Departamentiniń dırektory Danııar Taýmurat jurtshylyq tarapynan mektepti jóndeý, tazalaý nemese basqa da sharalarǵa aqsha jınaý faktilerine qatysty aqparattar bar ekendigi týraly baıandady. Departament dırektorynyń aıtýynsha, mundaı isterge ata-analar shyǵyndanbaýy qajet, óıtkeni, barlyq qajettilikterge bıýdjetten bólingen qarajat jetkilikti. Mektepterde aqsha jınaýǵa qatysty aqparattar barynsha tekserilip, ondaı keleńsizdikter oryn alǵan jaǵdaıda kináli azamattar qatań jazaǵa tartylatyn bolady. Tipten, qylmystyq is qozǵalýy da múmkin. Sybaılas jemqorlyqpen qarsy kúreste sıfrlandyrýdyń yqpaly zor. Sondyqtan da Bilim basqarmasy memlekettik qyzmetterdi avtomattandyrýdy jolǵa qoıyp, ótken jyldan bastap «Almaty mektep» baǵdarlamasy jumys isteı bastady. Onyń nátıjesine oraı bıylǵy jyly bala baqshalarǵa kezekke qoıý baǵdarlamasy qolǵa alynýda.
Al Almaty qalasy Bilim basqarmasynyń basshysy Gúlnar Qojabergenovanyń aıtýynsha, pedagogtardyń basty mindeti – balalardy oqytý men tárbıeleý. Qazirgi kezde jóndeý jumystaryna, qajetti buıymdar alýǵa aqsha jınaýǵa negiz joq. Bilim mekemelerine tıesiliniń barlyǵy memlekettiń menshigi, ıaǵnı salyq tóleýshilerdiki. Osy oraıda Bilim basqarmasy mektepterge aqsha jınaýǵa tyıym salynǵany týraly arnaıy hat joldap, ony qadaǵalaý birinshi basshyǵa júkteledi. Osy jaıtqa baılanysty bıylǵy jyldyń ózinde 7 mektep dırektory qyzmetinen bosatylǵan.
Elvıra SERIKQYZY,
«Egemen Qazaqstan»
ALMATY
