«Atyraý» gazetiniń mereıtoıyna oraı «Atyraý-aqparat» ortalyǵynda medıa-mýzeı men ınternet-kanal ashyldy.
Atyraý jýrnalıstıkasynda tuńǵysh ret ashylǵan medıa-mýzeıge 400-ge jýyq jádiger qoıyldy. «Shejireler syr shertedi», «Jýrnalıst – oqıǵa ortasynda», «Tarıhy tereń tólarna» atty 3 bólimnen turatyn mýzeıde eki oblystyq, jeti aýdandyq gazet pen oblystyq telearnanyń shejireli joly týraly málimetter bar.
«Atyraý» gazetiniń 95 jyldyq mereıtoıyna arnaıy kelgen Qazaqstan jazýshylar odaǵynyń basqarma tóraǵasy Ulyqbek Esdáýlet pen «Atyraý» gazetinde kóptegen jyldar redaktorlyq qyzmet atqarǵan Qılybaı Qýanyshbaıuly medıa-mýzeıdiń saltanatty ashylý lentasyn qıdy.
– Búgin biz taǵy da erekshe oqıǵanyń kýási bolyp turmyz. Bul mýzeı – 95 jyldyq tarıhy bar gazettiń ǵana emes, búkil oblystyń shejiresi. Osy óńir úshin terin tókken, kóziniń maıyn taýysqan qajyr-qaıratyn jumsaǵan adamdardyń tynys-tirshiligi – osy mýzeıde. Onyń ar jaǵynda oblystyń ekonomıkasy ǵana emes, ádebıetimiz ben mádenıetimiz de tur. Medıa-mýzeı keleshek urpaqtar úshin úlken qyzmet atqaratyna senim bildiremin, – dedi Qazaqstan Jazýshylar Odaǵynyń basqarma tóraǵasy Ulyqbek Esdáýlet.
Medıa-mýzeıde alǵys hattar, tanymal tulǵalardyń qoljazbalary, ardager jýrnalısterdiń fotosýretteri men quraldary qoıylǵan. Sondaı-aq, «Atyraý» telearnasynda 1967 –1977 jyldary qyzmet etken jýrnalısterdiń fotosýretteri ilingen qabyrǵa jáne «Atyraý-Aqparat» baspahanasynyń ónimderi de bar.
«Atyraý-Aqparat» medıa portaly da búgin resmı túrde ashyldy. Munda jýrnalısterge barlyq múmkindik qarastyrylǵan.
Merekelik shara aıasynda ótken «Qazirgi qazaq jýrnalıstıkasy: jańa trendter men tehnologııalar» taqyrybyndaǵy respýblıkalyq medıa-konferensııada oblys ákimi Nurlan Noǵaev ataýly kúnmen quttyqtap, tabys tiledi.
«Atyraýdyń» 95 jyldyǵyna arnalǵan sharalar legi «Ultqa–mura, urpaqqa – rýh!» atty tarıhı-tanymdyq ekspedısııamen jalǵasady.
Baqytgúl BABASh,
«Egemen Qazaqstan»
Atyraý
