Jıynǵa Ázerbaıjan, Armenııa, Belarýs, Qazaqstan, Qyrǵyzstan, Moldova, Reseı jáne О́zbekstan elderiniń energetıka salasyndaǵy memlekettik atqarýshy organdary men kompanııalardyń ókilderi, sonymen qatar TMD atqarýshy komıteti men Eýrazııalyq ekonomıkalyq komıssııa jáne «Energııa» BDO ókilderi qatysty.
Jıynda elektr energetıkasy salasynda TMD-ǵa múshe-memleketter arasyndaǵy ózara is-qımyl jáne yntymaqtastyq strategııasyna ózgertýler men tolyqtyrýlar engizilip, atalǵan saladaǵy 13 keleli másele talqyǵa salyndy. Reseı Federasııasynyń Energetıka mınıstri Aleksandr Novaktyń aıtýynsha, atalǵan uıymǵa múshe-memleketterdiń energetıka salasyndaǵy áriptestik baılanysy artyp keledi.
– Elektr energııa júıesinde TMD-ǵa múshe-memleketterdiń ózara birlestikte jumys júrgizýi asa mańyzdy. Bul rette, atalǵan salada qaýipsizdik saqtaý sharalaryn, sonymen qatar halyqqa jáne kásiporyndarǵa elektr qýatyn jetkizýde qyzmet kórsetý sapasyn jaqsartýdy kózdeımiz. Bizdiń júıeni jeke alyp qaraý múmkin emes. Barlyǵy bir-birimen tyǵyz baılanysqan. Búgingi keńeste kúzgi-qysqy naýqanǵa daıyndyq sharalary, elektr energııasymen qamtý máseleleri qarastyrylyp otyr. Bul kezeńderde energııa qýatyna suranystyń eki ese artatyny túsinikti. Sondyqtan tapshylyq týyndamas úshin daıyndyq sharalary júrgizilýde, – dedi A.Novak. Onyń aıtýynsha, Reseı men Qazaqstan arasynda energetıka salasyndaǵy barlyq baǵyt boıynsha jumys atqarylýda. Taıaýda eki el arasyndaǵy munaı-gaz salasynda kelisim jasalsa, sonymen qatar «Baıqońyr» ǵarysh aılaǵyn gazdandyrý boıynsha kelisim daıyndyq ústinde.
Qazaqstannyń Energetıka mınıstri Qanat Bozymbaevtyń aıtýynsha, atalǵan jıynda TMD elektr energetıkalyq keńesi men Eýrazııalyq ekonomıkalyq qoǵamdastyq arasynda ortaq kelisimge qol qoıyldy. Aıta keterligi, Qazaqstan eki uıymǵa da múshe-memleket bolǵandyqtan eki taraptyń usynystarynan qarama-qaıshylyq kórmeıdi. Al Ázerbaıjan men Tájikstan syndy elder úshin bul qujattyń mańyzy erekshe bolyp otyr.
– Basqosýda sonymen qatar energetıka salasyn qalaı damytý kerek degen suraq tóńireginde pikir almastyq. Bul taqyrypty kóterip otyrǵan sebebimiz, Reseı men Qazaqstanda energetıkanyń damý deńgeıi bir bolsa, Tájikstan men Armenııada basqa deńgeıde. Jalpy, keńeske múshe elderdiń energetıka salasyn bir arnaǵa toǵystyrý nazarǵa alynbaq. Sonymen qatar TMD elderindegi JOO-da energetıkany oqytýdaǵy ortaq standart engizý josparlanyp otyr. Aldaǵy ýaqytta uıymǵa múshe-memleketterdiń túlekteri esh kedergisiz elektr energııasy salasynda óz biliktilikterin kez kelgen jerde kórsete alady, – dedi Q.Bozymbaev.
TMD elderi Úkimet basshylary keńesiniń keńeıtilgen otyrysynda bekitilgen kelisimniń ishinde atom energetıka salasy da bar. Ony iske asyrý joldary TMD elektr energetıkalyq keńesiniń 53-shi otyrysynda keńinen qarastyryldy.
Erkejan AITQAZY,
«Egemen Qazaqstan»
