Pavlodar óńirindegi kommýnaldyq qyzmetterdiń qysqa daıyndyǵy qandaı? Oblystyq Energetıka jáne turǵyn úı kommýnaldyq sharýashylyq basqarmasynyń basshysy Erjan Imanzaıypovtyń aıtýynsha, aldaǵy qysta oblys ortalyǵy, Ekibastuz, Aqsý qalalaryn qardan tazalaý úshin kommýnaldyq qyzmetterdiń qaramaǵynda 365 arnaıy tehnıka, 31 sý sorǵysh mashına jáne 410 jumysshy bar.
– Qysqy kezeńde blog-platformama kelip túsetin ótinishterdiń 80 paıyzy jylýdyń durys berilmeýi, ystyq sýdyń joq bolýyna jáne kóshelerdiń qardan tazalanbaýyna baılanysty, – dedi oblys ákimi Bolat Baqaýov.
Tipti oblys ortalyǵynda bıylǵy jylý maýsymyna daıyn emes 60-qa jýyq turǵyn úıler anyqtalǵan. Qalada peshpen jabdyqtalǵan 2300-den astam jer úı de bar. Byltyr oblys ortalyǵynyń Tolstoı kóshesindegi №82 úıdiń turǵyndary páterlerindegi temperatýra 14-16 gradýs deńgeıinde ǵana turǵanyn, jylytqyshtarmen jylynyp otyrǵandaryn, Kýtýzov kóshesindegi №291 úı, úshinshi kire beristiń turǵyndary aıazdyń kesirinen lıftiniń toqtap qalý qaýpi bar ekenin, Kataev kóshesindegi №12 úıdiń páterlerindegi temperatýra 18 gradýsqa áreń jetip turǵanyn oblys ákiminiń saıtyna jazǵan-dy.
Sonymen birge óńir basshysy bıylǵy jylytý maýsymy bastalǵannan beri ákimdiktiń resmı blog-platformasyna 29 shaǵym kelip túskenin aıtty.
Jer qara, kún jylyda jylý máselesine qatysty shaǵymdar túsip jatsa, erteńgi aıazdarda turǵyndardyń amaly qaısy? Al qalalyq ákimdiktiń saıtynda ákimdik bólimderiniń qur syzbasy ǵana berilgen. Ákimdik saıtynda basqa bólimderdiń saıttarymen birge, eń negizgi turǵyndarǵa kerekti degen baılanys, habarlasý, jedel jeliler jaıly aqparattar beriletin Turǵyn úı-kommýnaldyq sharýashylyq bóliminiń saıty engizilmepti de. Al qalalyq Turǵyn úı-kommýnaldyq sharýashylyq bóliminiń atyna saı jalpy jumysy jaıly eshqandaı aqparat kezdestirmeısiz.
– Turǵyndar amalsyzdan qabyldaý bólmeme qońyraý shalady. Qalalyq kommýnaldyq sharýashylyq bóliminiń Jedel jelisi qońyraý qabyldamaıdy dep shaǵymdanýda, – dedi B.Baqaýov. – Biz jedel jelini qala turǵyndarynyń turǵyn úı-kommýnaldyq sharýashylyq máselelerin shuǵyl sheshý úshin qurǵan joqpyz ba?!
Farıda BYQAI,
«Egemen Qazaqstan»
PAVLODAR
