Batys Qazaqstan oblysynda tuńǵysh ashylyp otyrǵan ortalyqqa óńir basshysy Altaı Kólginov arnaıy keldi. Ýnıversıtet rektory Asqar Námetov bıyl 55 jyldyǵyn atap ótken irgeli bilim ordasynda qolǵa alynǵan «SMART university» jobasy týraly áńgimeledi.
– Ýnıversıtettegi «Smart university» jobasyn bastap otyrmyz. Bul ortalyqta stýdentterge de, oqytýshylarǵa da avtomatty qyzmet úlgisin kórsetedi, – dedi Asqar Námetov.
– Elbasymyz kelesi jyldy Jastar jyly dep atady. Jastarǵa eń basty qoldaý – bilim alýǵa, kásip úırenýge barlyq múmkindikti jasaý. Prezıdentimiz táýelsizdiktiń alǵashqy jyldarynan-aq bilimge erekshe kóńil bóldi. «Bolashaq» baǵdarlamasy paıda boldy, Nazarbaev Ýnıversıtet, zııatkerlik mektepter, lıseıler ashyldy. Olar qural-jabdyqpen qamtamasyz etilip, qanshama grant bólinip jatyr. Bes áleýmettik bastama boıynsha bıyl taǵy da qosymsha grant bólindi. Bul granttyń ıegerleri bizdiń óńirde de, osy ýnıversıtette de bar. Memleket jyl saıyn jastarǵa jańa keńistik ashyp otyr. Eń basty kózdegen maqsat – sapaly bilim berý. Biz aldyńǵy qatarly memleketterdiń tizimine engimiz kelse, jastarymyz bilimdi bolýy kerek. Basqa jol joq! Búgin ashylǵan stýdentterge qyzmet kórsetý ortalyǵy da bilim sapasyn arttyrýǵa sep bolady dep oılaımyz, – dedi Altaı Kólginov ortalyqtyń ashylý saltanatynda.
Stýdentterge qyzmet kórsetý ortalyǵynyń lentasyn «Rýhanı jańǵyrý» ortalyǵynyń professory, fılosofııa ǵylymdarynyń doktory Tilekjan Rysqalıev pen mashına jasaý fakýltetiniń 4-kýrs stýdenti, Prezıdent stıpendııasynyń ıegeri, JOO arasynda ótkizilgen «Úzdik stýdent-2018» baıqaýynyń jeńimpazy Gúlnur Tilepbergen qıdy. Ortalyq qyzmetin tuńǵysh paıdalanǵandardyń biri mashına jasaý fakýltetiniń 4-kýrs stýdenti Musa Kóneev boldy.
– Buryn dál osy transkrıpti alý úshin bir apta ýaqytymyz ketetin. Búgin, mine, bes-aq mınýt jumsadym, – deıdi Musa. – Ýaqytty tıimdi paıdalanatyn boldyq. Bul jerde únemdelgen ýaqytty bilim alýǵa, basqa da paıdaly iske jumsaımyz.
Stýdentterge qyzmet kórsetý ortalyǵynyń jumysymen tanysqan Altaı Kólginov Jáńgir han atyndaǵy BQATÝ-diń 1-kýrs stýdentteri aldynda «Bilimge talpynys – jetistiktiń negizgi kilti» taqyrybynda qoǵamdyq dáris ótkizdi.
Qazbek QUTTYMURATULY,
«Egemen Qazaqstan»
Batys Qazaqstan oblysy
