– Osy aıda qolyma 42 700 teńge alamyn. Bergendi kim jek kórsin, kádimgideı qýandym. Qazir munyń ózi bireýler úshin asa kóp qarjy emes shyǵar, biraq men úshin bul az emes. Qazir kommýnaldyq tólemderden bastap, dastarqandaǵy azyqtyń bári satýly ǵoı. Qosylǵan aqsha sonyń birin óteıdi. Berekesin bersin. Elbasyna rahmet! Eldiń jaǵdaıy túzelip keledi, al «elde bolsa, eringe tıedi» degen osy, – dedi D.Erjanov.
Bul elevator Keńes Odaǵy kezinen qalǵan, 90-jyldary eshkimge kerek emes bolǵan nysan edi. Sony «Elevator Agrofýd» kásiporny qoldan kelgenshe qalpyna keltirip, qazir Torǵaı óńirinde ósetin az bolsa da saz, qamyrlylyǵy 30-dan aınalatyn sapaly bıdaıdy saqtap, satyp otyr.
– Bizdiń Torǵaı óńiriniń bıdaıyna bir jaǵy Qytaı, bir jaǵy arabtar, qasymyzdaǵy Reseı qyzyǵýshylyq tanytady. Taıaý ýaqytta táýligine 70 tonna un tartatyn germanııalyq qýaty myqty dıirmen qoıamyz, sonda taǵy da 10-15 adamǵa jumys beremiz. Jalaqyny taǵy kóbeıtýge de jaǵdaıymyz kelip qalar dep oılap otyrmyz. Búginde elevatorda 22 adam jumys isteıdi. Sonyń arasynan aıyna 32-33 myń teńge alatyn 5-6 adamǵa jalaqyny kóbeıttik. Bul tek negizgi jalaqy ǵana. Aýyl sharýashylyǵyndaǵy jumys ýaqytpen sanasa bermeıdi ǵoı, keıde qosymsha jumystardy atqarý kerek bolǵanda saǵatyna taǵy da ústeme tólenedi, – deıdi elevatordyń atqarýshy dırektory Qurman Abdrahman.
«Elevator Agrofýd» jaýapkershiligi shekteýli seriktestigi qatty bıdaıdy sapaly saqtaýdy, óńdeýdi odan ári damytýǵa bet alǵan. Qazir Iranǵa suly artý úshin ony tazalap, suryptap jatyr.
– Elbasy tapsyrmasy múltiksiz oryndalady. Ekonomıkany damytpasaq, elge paıdamyz tımese nege júrmiz? Bul ár kásipkerdiń paryzy bolýy tıis, – deıdi Qurman Turǵanuly. Isine tııanaqty kásipker sózine de berik.
Názıra JÁRIMBET,
«Egemen Qazaqstan»
ARQALYQ
