Birinshi kezeńde qos komanda bir-biriniń osal tusyn taba almady. Esesine úzilisten keıin birqatar ekpindi shabýyldar uıymdastyrylyp, oıyn qyza tústi. Ekinshi kezeń bastalǵan bette qonaqtardyń sál kidirip qalǵanyn utymdy paıdalanǵan aıdyn ıeleri esep ashty. Bul goldyń avtory – Rýdolf Cherveny. Biraq sol keshte Ondreı Nepela atyndaǵy qysqy stadıonǵa jınalǵan 6 436 kórermenniń qýanyshy uzaqqa sozylmady. 27 mınýtta Nıkıta Mıhaılıs jáne 31 mınýtta Dmıtrıı Grens nysanany dál kózdep, astanalyq komandany 2:1 esebimen alǵa shyǵardy. Odan keıin eshteńe ózgergen joq. Bul esep matchtyń sońyna deıin saqtaldy.
Osy jeńisiniń arqasynda «Barys» jarys kestesindegi jaǵdaıyn taǵy da jaqsarta tústi. Kúni búgingi deıin 24 kezdesý ótkizgen jerlesterimiz 34 upaımen turaqty birinshilikte altynshy oryndy ıelenýde. Endi óziniń kelesi básekesin astanalyqtar 12 qarashada Novosibirde jergilikti «Sıbır» klýbyna qarsy ótkizedi.
Ǵalym SÚLEIMEN,
«Egemen Qazaqstan»
