Árkim óz babasynan qaıratker jasap shyǵarý jolynda arpalysqan qazirgi kezeńde kózden de kóńilden de tasa qalyp kele jatqan shynaıy qaıratkerdi tanyp jáne elge tanytý maqsatyndaǵy maqala úshin basylymǵa da, tilshige de alǵys aıtamyn. Gazettiń oqylymdylyǵy halyqqa qajetti, ótkendi jańǵyrtyp, búginniń naqty beınesin bere bilýmen artady. Sondyqtan bes jylǵa sozylǵan qııan-keski maıdanda azamattyq aryna, qazaqy qanyna qylaý túsirmeı shaıqasqan, el atyna kir keltirmegen babamyz, qazaqtan shyqqan tuńǵysh kásibı teńizshi ofıser, Reseı federasııasy «Sevastopol qalasynyń qurmetti azamaty» atanǵan Qalmaǵanbet Qalaqaýov nasıhattaýǵa, urpaqqa úlgi etýge turatyn tulǵa.
Jer shalǵaılyǵyna, memlekettiń derbestiginen be, osy ýaqytqa deıin Qalmaǵanbet atamyz týraly atalas aǵaıyn-týystary bolmasa, jalpy halyqtyń, qalyń qazaqtyń bile bermegeni aqıqat. «Egemen Qazaqstan» gazetinde jarııalanǵan maqala osy tońdy eritip, esil erdiń eńbegi men erliginiń týǵan elinde laıyqty deńgeıde ardaqtalýyna jol ashady dep jáne Memleket basshysy usynǵan «Bolashaqqa baǵdar: rýhanı jańǵyrý» baǵdarlamasy aıasynda batyr esimin urpaq sanasyna sińirý, týǵan halqymen qaıta qaýyshtyrý baǵytyndaǵy jumystar qoldaý taýyp, súıegi jat jerde qalǵan babamyzdyń erligi jańǵyrady, rýhy shattanady dep oılaımyn.
Qazirgi tańda Q.Qalaqaýovtyń ómir joly, qyzmeti, soǵys jyldaryndaǵy erlikteri men soǵystan sońǵy qyzmeti, otbasylyq jaǵdaıy tereń zerttelý ústinde. Sońynda qalǵan eki qyzynyń biri ómirden ótken eken, denesi Sevastopol qalasyna jerlenipti. Ekinshi qyzy Reseıden týǵan elge – Almaty qalasyna kóship kelý baǵytynda júr. Qyzymen habarlasyp, ákesi týraly málimet alýǵa qol jetkizdik. Sonymen qatar Mańǵystaý oblystyq tarıhı-ólketaný mýzeıi basshylyǵymen habarlasyp, mýzeıden óńirden shyqqan tanymal tulǵa, Ekinshi dúnıejúzilik soǵysqa bastan-aıaq qatysyp, sol kezderi qazaq balasy úshin tań kórinetin jáne sırek kezdesetin mamandyq – teńizshi ofıser atanyp, soǵystan soń da osy salada jemisti eńbek etken Q.Qalaqaýovqa arnap burysh nemese arnaıy stend daıyndaýdy ótingen edik. О́tinishimizdi aıaqsyz qaldyrmaǵan mýzeı basshylyǵyna da rızashylyǵymdy bildiremin, qazirgi tańda Sevastopol qalasynan mýzeı úshin Q.Qalaqaýovtyń kıteli, ózge de buıymdary aldyrylýda. Sondaı-aq Q.Qalaqaýov álemniń ár túkpirindegi tanymal qazaqtar týraly málimet jınap, olar týraly arnaıy ensıklopedııa qurastyrýdy qolǵa alǵan azamattardyń qyzyǵýshylyǵyn týdyryp, qazir olar da babamyz týraly zertteý jumystaryn qolǵa aldy. Ol ister – jeke rýdyń dańqyn asyrýǵa emes, batyr uldy ardaqtaýǵa, eldi, ásirese jas urpaqty ata bolmysyna qarap boı túzýge shaqyrýǵa baǵyttalatyn bolady.
Taǵanııaz BOHANULY,
«Kedeı ata» qoǵamdyq qorynyń tóraǵasy
Mańǵystaý oblysy
