Jan-Fransýa Gote Kanadadan Qazaqstannyń ınnovasııalyq tehnologııalar, startap jobalar salasynda damýyna kómektesý maqsatynda kelgen.
«Biz bul jerde Qazaqstanǵa AT-tehnologııalar salasyn damytýǵa kómektesý úshin keldik. Biz Qazaqstandy AQSh-pen, Eýropamen baılanystyra alamyz, basqa elderde jınaǵan tájirıbemizben bólise alamyz, sóıtip, basqa elderdiń kompanııalary sııaqty Qazaqstannyń damýyna járdemdese alamyz», — dedi Jan-Fransýa Gote.
Bul oraıda ol búgingi tańda Qazaqstannyń ınnovasııalyq tehnologııalar salasynda zor áleýeti bar ekenin atap ótti.
«Munda Qazaqstannyń AT salasynda órkendeýine múmkindik beretin ınjenerlik jáne aqparattyq jobalar kóp», — dedi J. Gote.
Belgili kásipker, Priceline.com, ColorJar jáne LLC, the Idea Accelerator kompanııalarynyń negizin salýshy jáne teń ıesi Djeff Hoffman óz kezeginde sońǵy bes jyl ishinde AT-ındýstrııa, jańartylatyn energııa kózderi, bilim berý salalarynda qazaqstandyq startaperlerge keńes bergenin aıtty.
«Men buryn Qazaqstanda bolǵanmyn, bul munda birinshi kelýim emes. Sol kezde jergilikti kásipkerlermen kezdesip, Almatyǵa barǵanmyn. Kásipkerlermen áńgimelesý barysynda men kóptegen jaqsy ıdeıalardy estidim. Al búgin Qazaqstandaǵy kásipkerliktiń aınalasynda ekojúıe qurýdy jalǵastyrý maqsatynda osyndamyn», — dedi Djeff Hoffman.
Atap aıtqanda, ol ındýstrııalyq tehnologııalar salasynda qazaqstandyq jáne amerıkalyq jobalardyń odan arǵy kooperasııalary boıynsha jumystar jalǵastyrylatynyn aıtty.
Sonymen qatar, D. Hoffman Digital Bridge forýmynyń atalmysh salany odan ári damytýdaǵy rólin atap ótti.
«Qazir men naqty jumys istep turǵan jobalardy atap bere almaımyn, sondyqtan Digital Bridge forýmy asa mańyzdy, sebebi, munda biz talantty ónertapqyshtarmen jáne óz isin jańa bastaǵan kásipkerlermen tanysa alamyz», — dedi D. Hoffman.
