О́ńirdegi aýyl sharýashylyǵy salasynyń qyzmetkerleri jyldyń basty baǵdarlamalyq qujatyn talqylaý kezinde oı jelisin osy tustan sabaqtady. Jıynda oblys ákimi Berdibek Saparbaev atap kórsetkendeı, jyl saıyn agrarlyq sektordy odan ári damytý úshin oblystyq bıýdjetten 13-15 mıllıard teńge qarajat bólinedi. Bul qomaqty soma qaıtarymsyz emes. Buǵan aýyl sharýashylyǵy ónimderi artyp kele jatqany aıqyn aıǵaq.
Aıtalyq, bıylǵy 9 aıda aımaqtaǵy aýyl sharýashylyǵy qurylymdary 157 mıllıard teńgeniń ónimin shyǵarǵan. Munyń ózi ótken jylmen salystyrǵanda 4 paıyzǵa joǵary. Jyl aıaǵyna deıin bul kórsetkish taǵy da ósedi dep kútilýde. Sonymen birge atalǵan kezeńde salaǵa 15 mıllıard teńgeniń ınvestısııasy tartylǵany da táýir nátıje bolmaq. Al eksporttyq ónim boıynsha oblysta negizinen et eksportyndaǵy belgilengen meje artyǵymen oryndalyp keledi. Áıtse de munyń ózi tabys shegi bolyp qala almasa kerek. Sonymen bir mezgilde eksporttyq ónim aýmaǵyn ulǵaıtý sharalary aıasynda, onyń geografııasyn kórshiles О́zbekstan jáne Arab elderimen keńeıtý sharalary belgilengen.
Aqtóbe – mal sharýashylyǵyn órkendetýge óte qolaıly óńir. Endeshe óńirdiń bul baǵyttaǵy áleýeti men múmkindigin odan ári ósirý joldaryn izdestirýdiń esh artyqshylyǵy joq. Qazirgi kezde óńirde mal basynyń ósý kórsetkishi 5-7 paıyz tóńireginde. Áıtse de muny 10-15 paıyzǵa deıin kóterýge tolyq múmkindik bar. Onyń basty joly – asyl tuqymdy mal sanyn kóbeıtý jáne mal azyǵy bazasyn ulǵaıtý. Joldaýda qoıylǵan basty mindetterdiń biri de osy. Taǵy bir aıta keterlik másele, búgingi tańda oblystaǵy agroqurylymdardyń deni usaq sharýashylyqtar. Odan túsetin tabys pen paıda tómen ekenin tájirıbe kórsetip keledi. Sondaı-aq usaq sharýashylyqtarǵa qarjylaı kómek berýdiń tıimsizdigi de aıqyn kórinýde. Bul máseleniń sany bar da, sapasy kúmándileý aýyl sharýashylyǵy kooperatıvterine de qatysy bar. Sondyqtan da ony irilendirý men áleýetin arttyrý isi de aldaǵy ýaqyttyń enshisine tımek. Bir sózben aıtqanda, memlekettiń bir teńgesin belgili bir ýaqyt ishinde 1,5-2 teńge ákeletindeı esep jasalyp, soǵan sáıkes tııanaqty is tyndyrylýǵa tıis. Sonda ǵana ekonomıkanyń únemdiligi men tıimdiligine qol jetkizýge bolady.
Joldaýdaǵy basty mindetterdiń biri – jalaqy mólsherin ósirý. Oblysta 6200 sharýashylyq sýbektileri bar. Onda 32 myńnan astam adam jumys isteıdi. Olardyń ortasha jalaqysy – 78 myń teńge. Bul agroónerkásip kesheni qyzmetkerleriniń jalaqysy tómen ekenin kórsetedi. Endeshe ony ósirý máselesi ótkir qoıylýǵa tıis. О́ńirde bul másele 1 jeltoqsanǵa deıin sheshimin taýyp, jalaqy mólsheri 10-15 paıyzǵa deıin ósirilmek.
Aýyl sharýashylyǵy qyzmetkerleri salalyq kásipodaǵy Aqtóbe oblystyq fılıalynyń tóraǵasy Turaqbaı Sultanǵalıev Memleket basshysy tarapynan agroónerkásip kesheniniń áleýetin arttyrýǵa basymdyq berilgeni úlken serpilis týǵyzǵanyn atap kórsetti. Ol jumys berýshiler men jumysshylar taraby arasynda áleýmettik-ekonomıkalyq jáne eńbek kepildikteri boıynsha 62 ujymdyq shart jasalǵanyn alǵa tartty. Salalyq kásipodaq tóraǵasy Joldaýda aıtylǵan tapsyrmalar men mindetter júzege asqan jaǵdaıda aýyl sharýashylyǵy qyzmetkerleriniń jaı-kúıi jaqsara túsetinin jetkizdi.
Temir QUSAIYN,
«Egemen Qazaqstan»
AQTО́BE
