Bob DORF,
kásipker, «The Startup Owners Manueal» kitabynyń avtory:
– Men álemniń kóptegen elderiniń startap kórmelerinde boldym. Bul – Qazaqstanǵa alǵashqy saparym. Shynymdy aıtsam, Qazaqstan startaptarymen tánti etti. Osy ýaqytqa deıin 60-qa jýyq jobamen tanystym. Bir baıqaǵanym, qazaqstandyq joba jasaýshylar ońaı ári qoljetimdi tehnologııalardy paıdalanyp, tıimdi, qyzyqty baǵdarlamalar jasaǵan. Sondyqtan, Qazaqstannyń ınnovasııalyq tehnologııalar salasynan kóp úmit kútemin. Bul salaǵa memleket tarapynan kómek kórsetilip, kóńil bóliný kúnderdiń kúni álemdik mańyzy bar bastamalardyń qolǵa alynýyna alyp keledi. Qazaqstan Úkimetiniń startap salasyna ınvestısııa bólýin qoldaımyn.
Djozef SIGLER,
«Astana Hub» bas atqarýshy dırektory:
– Qazaqstannyń startap júıelerine úlesimdi qosa alǵanyma qýanyshtymyn. Startaptyń tek ıdeıa júzinde emes, naqty iske asyrylyp jatqany qýantady. «Astana Hub»-tyń jańa basshysy retinde osyndaǵy startaptardy damytyp, buǵan jastardy da jumyldyrýǵa tyrysamyn.
Qazir barlyǵy Sılıkon alqabynda jasalǵan daıyn ónimderdi kóshirip alýǵa áýes. Bul durys emes. Jańa qyzmetimde Qazaqstannyń jeke, beıimdelgen «Sılıkon alqabyn» jasaýǵa tyrysamyn. «Astana Hub» tek jańa tehnologııalar jasaıtyn alań emes, oqytý alańyna aınalǵanyn qalaımyn. Kásipkerlik týraly keńester men tehnologııalar salasyndaǵy bilimdi arttyrýǵa, kıbertehnologııa týraly aqparat alýǵa múmkindik bergimiz keledi.
Olga AFANASEVA,
UVCA atqarýshy dırektory:
– Júzdegen startap tanystyrylǵan úlken forýmǵa qatysý sebebim – Ýkraına men Qazaqstan arasyndaǵy ınnovasııaǵa negizdelgen kópir túzý. Qazaqstanda startapty damytýǵa bılik pen kásipkerler jumyla kirisken. Memleket tarapynan qoldaýlar men jeke kásipkerlerdiń ınvestısııalary bul salanyń úlken jetistikterge jetetinine qazirdiń ózinde sendiredi. Ártúrli qaýymdastyqtar men qorlardyń ashylýy startap jobalardyń qarqynyn kúsheıtpek. Qazaqstan men Ýkraınanyń ınnovasııalyq tehnologııa salasyndaǵy myqty tustaryn biriktirsek, úlken jetistikterge jete alamyz dep oılaımyn.
Jan-Fransýa GOTE,
«Startup Genome» bas dırektory:
– Kanadadan Qazaqstanǵa IT tehnologııalar salasyn damytýǵa kómek berý maqsatynda keldik. Qazaqstandy AQSh jáne Eýropamen baılanystyra alamyz dep oılaımyn. Bul úshin barynsha kooperatıvti bolýymyz qajet. «Startup Genome» kompanııasy osy saladaǵy óz tájirıbesimen bólisýge daıyn. Qazaqstannyń ınnovasııa men tehnologııalar salasyndaǵy áleýeti óte jaqsy. Buǵan qosa, elde ınjenerlik jáne aqparattyq turǵydan nátıjeli jobalar bar. Olar bolashaqta Qazaqstannyń ınnovasııalyq tehnologııalar salasynyń gúldenýine septigin tıgizedi dep senemin.
Daıyndaǵan
Svetlana ǴALYMJANQYZY,
«Egemen Qazaqstan»
