О́ndiris salasyn sıfrlandyrýdyń budan basqa da utymdy tustary kóp. Eki jyl buryn «Embimunaıgaz» AQ «Ýaz» ken ornynda «Intellektýaldy ken alańy» jobasyn iske qosqan edi. Sonyń nátıjesinde elektr energııasyn paıdalaný kórsetkishi, uńǵymalardy jóndeý shyǵyny, jerasty jóndeý jumystary aıtarlyqtaı azaıdy. Endi operator mamandar burynǵydaı jazdyń aptap ystyǵy men qystyń qaqaǵan sýyǵynda uńǵymalardy tekserip, isten shyqqan jaǵdaıda ken alańdaryn aralap júrmeıdi. Bári avtomatty túrde jáne qashyqtyqtan júzege asady. Qondyrǵylarǵa túsetin aýyrtpalyq azaıǵandyqtan, kóp buzylmaıdy. Qaýipsizdik te saqtalady, ıaǵnı dıspetcherge dabyl kelip tússe, apatty jaǵdaı bola qalsa, jabdyq avtomatty túrde toqtatylady.
Elbasy halyqqa Joldaýynda «Indýstrııalandyrý jobasy jańa tehnologııalardy engizýde kóshbasshy bolýy tıis», dep atap ótken bolatyn. «Intellektýaldy ken alańy» jobasy ótken jyly «Prorva» ken ornynda qolǵa alynsa, bıyl bul qatarǵa «Jańatalap» qosyldy. «2024 jylǵa deıin kompanııanyń 12 ken alańyna joba taratylady. Mundaǵy maqsat – munaı óndirý prosesterin ońtaılandyrý, óndiris barysynda týyndaǵan problemalar boıynsha jedel sheshim qabyldaý jáne taldaý», deıdi óndiristi avtomattandyrý jáne aqparat tehnologııasy departamentiniń dırektory Bolat Nysanbaev.
«QazMunaıGaz» BО́» AQ aqparattyq tehnologııa TPABJ departamentiniń dırektory Talǵat Mahambetov: «Intellektýaldy ken alańy» jobasynyń basty baǵdary «QazMunaıGaz» BО́» AQ óndirýshi aktıvterinde óndiristi basqarýdyń qazirgi zamanǵy keshendi júıesin qurý, – deıdi. − Búginde Embide jobany Prorva toby ken oryndarynda keńeıtý, О́zende MGО́S jelisiniń jedel esebin alýdy qaıta jańartý, «Qazgermunaıda» ken oryndaryn avtomattandyrylǵan júıede baqylaý jáne basqarý, «Qarajanbasmunaıda» munaı aıdaý sehtarynda suıyqtyq balansyn esepke alýdy avtomattandyrý júıesi oryndalýda. «QMG BО́» AQ-da 2017 jyly Taldaý jáne sheshim qabyldaý ortalyǵy qurylyp, bul barlyq óndiristik aqparatty shyn mánindegi rejimde qamtamasyz etetin aýdıo-vıdeo jabdyqtarmen qamtamasyz etilgen. «Intellektýaldy ken alańy» jobasynyń perımetri «QMG BО́» AQ-tyń basym ken oryndarynan alynatyn munaı-gaz qorynyń 90%-dan astamyn qamtıdy».
«Embimunaıgaz» AQ basqarma tóraǵasy Ánýar Jaqsybekovtiń aıtýynsha, álemdik munaı-gaz salasy ıntellektýaldy ken alańdaryn qurýǵa aldaǵy bes jylda 1 mlrd dollar qarajat jumsaýdy josparlap otyr. Embiniń «Sıfrly ken alańy» jobasy ótken jyly IX búkilreseılik «Munaı-gaz salasyndaǵy 10 úzdik IT-joba» baıqaýynda úzdik dep tanyldy. Memleket basshysy Nursultan Nazarbaev «Sıfrly Qazaqstan» memlekettik baǵdarlamasyna engizilgen joba jumysymen tamyz aıynda Atyraýǵa kelgen saparynda tanysyp, oń baǵasyn bergen bolatyn. Innovasııalyq jobanyń ıgiligi kóp ekenin tájirıbe kórsetip otyr.
Baqytgúl BABASh,
«Egemen Qazaqstan»
ATYRAÝ
