Shalǵaıdaǵy Jaqsy aýdanyndaǵy Belaǵash kóli de bir kezde kóz jasyndaı taza, tabany jarqyrap jatatyn aq aıdyn edi. Jyldar óte kele kilkigen ýaqyt tozańy kóldi qorysqa aınaldyryp jiberdi. Laı sýdan balyq bitken qyrǵyn tapqan. Osy olqylyqtyń ornyn toltyrý úshin aýdan ákimdigi oblystyq tabıǵı resýrstar jáne tabıǵat paıdalanýdy retteý basqarmasynyń qoldaýymen kólge árqaısysynyń salmaǵy 20-30 gramm bolatyn, uzyn sany jeti myńǵa jýyq Amýrdyń aqmarqasy men dóńmańdaı balyq jiberdi. Ondaǵy maqsat – aýdan turǵyndaryn aýyz sýmen qamtamasyz etip otyrǵan Belaǵash kólin bıologııalyq turǵydan tazartý.
– Bul jaqsy bastama, – deıdi «Arkýda Platınıým» seriktestiginiń ókili Vasılıı Veıber, – qazir kólge balyq jiberip jatyrmyz. Balyqtyń bul túrleri kól tabanyndaǵy baldyrly qorysty qurtýǵa tıis.
Kóldi tazartýǵa septigi tıetin balyqtyń bul túrlerin Reseıden osy seriktestik arnaıy ákelgen eken. Olardyń ortasha ómir súrý uzaqtyǵy –30 jyl. Kól sýyna boı úıretý úshin arnaıy temperatýrany qalpynda ustaıtyn qurylǵylarmen jabdyqtalǵan ydystarmen jetkizilipti.
– El ıgiligi bolyp otyrǵan tabıǵatymyzǵa janashyrlyqpen qaramasaq bolmaıdy. Osy kólden alty myńǵa jýyq halyq sý iship otyr, – deıdi «Belaǵash» seriktestiginiń dırektory Vıktor Gertner, – uzaq ýaqyttan beri sheshimin tappaı kele jatqan másele edi. Endi mine, is ońynan oralǵaly tur. Aldaǵy ýaqytta jyl saıyn tazartý jumystaryn júıeli júrgizýdi oılastyrýdamyz.
Mamandardyń aıtýyna qaraǵanda, balyq bitkenniń qonys aýdarýy úshin qońyr kúz qolaıly eken. Bul kezde aýrý-syrqaýdan din aman bolatyn kórinedi. Sabaqty ıne sátimen oralsa, aqmarqa men dóńmańdaıdyń arqasynda Belaǵashtyń sýy baldaı móldir kóli baǵzy qalpyna qaıta kelmek.
Baıqal BAIÁDIL,
«Egemen Qazaqstan»
Aqmola oblysy, Jaqsy aýdany
