Qazaqstan Respýblıkasy úkimetiniń qaýlysyna sáıkes, 2018 jylǵy jasóspirimder Olımpıadasynda joǵary nátıje kórsetkeni úshin chempıondar men júldegerlerge, atap aıtqanda, «altyn» úshin – $10 000, «kúmis» úshin – $5 000, jáne «qolaǵa» – $3 000 kóleminde syıaqy berildi. Sondaı-aq, jeńimpazdardyń bapkerleri de quralaqan qalmady.
«Sizder halyqaralyq dodalar men Azııa chempıonattarynda kózge túsip, jasóspirimder Olımpıadasy sekildi keshendi jarysta alǵash ret baq synadyńyzdar. Bul úlken tájirıbe. Al bir-birlerińe qoldaý kórsetip, bir tý astynda birikkenderiń – biz úshin úlken qýanysh. Sizder tutas komandaǵa aınalyp, Ulttyq Olımpıadalyq komıtettiń basty maqsatyn júzege asyrdyńyzdar», - dedi QR UOK prezıdenti Tımýr Qulybaev.
«Elbasynyń halyqqa arnaǵan sońǵy joldaýynda sport pen sporttyq ınfraqurylymdy damytýǵa erekshe kóńil bólindi. Biz sport jáne mádenıet Mınıstrligimen birige otyryp, sporttyq ınfraqurylymdy jaqsartýǵa at salysamyz. Sonymen qatar, sport ýnıversıtetin qurý maqsaty da tur. Munyń bári elimizde sportshylardy daıyndaý júıesin qalyptastyrýǵa áser etetini sózsiz. Búgingi tańda úlken jetistigimen qýantqan talantty jastarymyz keleshekte el namysyn abyroımen qorǵaıtynyna bek senimdimin», - dedi UOK prezıdenti.
Býenos-Aıreste Qazaqstan quramasy tórt altyn, úsh kúmis jáne úsh qola medal jeńip aldy. Odan bólek, halyqaralyq komandalar sapynda kúmis jáne qola júldege ıelik etti.
Jasóspirimder Olımpıadasynyń chempıondary: Bekarys Sádýaqas (dzıýdo), Dıas Bahraddın (eskek esý), Gleb Brýsenskıı men Evgenıı Fedorov (velosport), Aıbek Oralbaı (boks).
Kúmis júldegerler: Damır Toıbaı (boks), Talǵat Shaıken (boks), Margarıta Grısenko (dzıýdo).
Qola júldegerler: Nadejda Rıabes (boks), Stella Sýhanova (eskek esý), Ábilmansur Batyrǵalı (karate).
Halyqaralyq komanda sapynda Roza Ábıtova (kórkem gımnastıka) kúmis, Bekarys Sádýaqas (dzıýdo) qola medal jeńip aldy.
Jasóspirimder oıynynda medal sany men júlde jeńip alǵan sport túrleri de rekordtyq kórsetkishke ıe boldy. Eske sala keteıik, Argentınaǵa sporttyń 23 túrinen 58 atlet attandy.
Altyn medal ıegeri, 17 jastaǵy Bekarys Sádýaqas qurama sportshylarynyń atynan sóz sóıledi.
«Argentınadaǵy dodaǵa qatysqan sportshylardyń atynan qoldaý kórsetken barshańyzǵa alǵys aıtamyn. Biz bul synǵa qarqyndy túrde daıyndaldyq. Eńbegimiz esh ketpeı, medalmen oralǵanymyz úshin qýanyshtymyn. Endi eresekter arasyndaǵy Olımpıadada top jarý úshin bar kúshimizdi salamyz», - dedi ol.
Kelesi jasóspirimder Olımpıadasy 2022 jyly Senegalda ótedi.
