Máselen, bul memlekettiń ókilderi jazǵy Olımpııa oıyndarynda 13 márte boı kórsetip, 100-ge jýyq óren baq synaǵan eken. Baıraqty básekede qol jetkizgen bar tabysy – qos qola medal. Sol júldeniń ekeýi de taekvondo sheberi Rohýlla Nıkpaıǵa tıesili. Al sol sańlaq jaıynda biz ne bilemiz?
Sporttyq dodalarda aýǵan halqynyń abyroıyn asqaqtatyp júrgen Rohýlla Nıkpaı hazar ultynan. Ol 1987 jyly Vardak óńirinde dúnıege kelip, keıinnen ata-anasymen birge Kabýlǵa kóshedi. Sol jerde júrip, taekvondonyń qyr-syryna qanyǵa bastaıdy. Talıbter bılikke kelgen tusta Nıkpaılar otbasy Kabýldan ketip, ırandyqtar qurǵan bosqyndar lagerinen pana tabady. Arada biraz jyl ótip, Aýǵanstandaǵy shıelenis biraz ońalǵannan keıin olar astanaǵa oralady. О́ziniń súıikti isimen aınalysýǵa múmkindik alǵan Rohýlla sport zalyn jaǵalap, jattyǵýyn qaıta bastaıdy.
Shyny kerek, «Baıtal túgel bas qaıǵy» bolǵan zamanda sportty dáriptep, bul ónermen bar ynta-nıetin salyp, kúsh-qýatyn sarp etip shuǵyldanatyn adam tabyla qoımaıtyny anyq. Jan-jaǵyńda qynadaı qyrylyp, qan jylaǵan halyq, atys pen shabys, zorlyq pen zombylyq, jetimder men jesirler, ashqursaq adamdar...
2004 jyly Afına Olımpıadasynda sátsizdikke ushyrǵan Rohýlla Nıkpaı 2008 jyly Beıjińde alaýy tutanǵan dodaǵa keremet daıarlyqpen keldi. 58 kılo salmaq dárejesinde óner kórsetken ol qola medaldy keýdesinde jarqyratty. Osylaısha, bul jigittiń esimi Olımpııa oıyndarynda júlde alǵan Aýǵanstannyń tuńǵysh sportshysy retinde tarıhta qaldy.
Kabýl áýejaıynan kútip alǵan sań myń halyq qaharman ulǵa erekshe qoshemet kórsetti. Aýǵanstannyń sol kezdegi prezıdenti Hamıd Karzaı han saraıyndaı úı syılap, temir tulpardyń kiltin tabys etti. Jamaǵattyń aldynda sóz alǵan Rohýlla: «Otyz jyl boıy qandybalaq soǵystan kóz ashpaı, qan jylap, qara jamylyp otyrǵan halqyna qýanysh syılap, ıgilikti bir is tyndyrý – Aýǵanstannyń árbir sanaly azamattyń asqaq armany. Meniń de maqsatym sol edi», – dep kóz jasyn bir irkip aldy.
2012 jyly Londonda alaýy tutanǵan Olımpııa oıyndyrynda jankeshti jigit dál sol nátıjeni qaıtalady. Sóıtip Nıkpaı Olımpııa oıyndarynyń eki dúrkin qola júldegeri atandy. Sonymen qatar Rohýlla 2012 jyly Kenjýde ótken álem chempıonatynda qola medaldi ıelense, Azııa birinshiliginde úsh ret júldegerler qatarynan kórindi. Taekvondoshylary bylaı tursyn, Aýǵanstandaǵy basqa da sport túri ókilderiniń eshbiri dál osyndaı orasan zor tabysymen maqtana almaıdy.
Ǵalym SÚLEIMEN,
«Egemen Qazaqstan»
