Keńes otyrysy barysynda Elbasy Joldaýy men Qazaqstan halqy Assambleıasynyń HHVI sessııasynda berilgen tapsyrmalardy iske asyrý barysy talqylandy.
L.Prokopenko óz sózinde Qazaqstan halqy Assambleıasynyń músheleri aldaǵy Jastar jylyna arnalǵan jańa jobalar ázirlep jatqanyn áńgimeledi.
«2019 jyly «Jańǵyrý joly» respýblıkalyq jastar qozǵalysynyń jol kartasy júzege asyrylady. Bul joba aıasynda barlyq sanattaǵy jastarymyzdy qoldaýǵa arnalǵan 19 ózindik joba jasalady. Sondaı-aq Qazaqstan halqy Assambleıasy elimizdiń ár óńiri boıynsha buqaralyq mektep týrızmin qolǵa alady. «О́z jerińdi tanyp-bil!» jobasy aıasynda respýblıkalyq-týrıstik «El taný» ekspedısııasy óz jumysyn bastaıdy», dedi ol.
Sondaı-aq onyń aıtýynsha, jastar arasyndaǵy áskerı-patrıottyq tárbıeni kúsheıtý maqsatynda Dostyq úıleriniń janynan áskerı-patrıottyq klýbtar ashylady.
«Elbasynyń bastamalaryn aqparattyq turǵyda júıeli túrde qoldaý úshin Qazaqstan halqy Assambleıasy «Jańǵyrý elshileri» jobasyn júzege asyrady. Onyń pýlyna ártúrli salalardyń úzdik ókilderi enedi», dedi Leonıd Prokopenko.
Sondaı-aq ol Qazaqstan halqy Assambleıasy músheleri bıylǵy jyly Elbasynyń 5 qazandaǵy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyn túsindirý jumystary boıynsha 1940 is-shara ótkizip, 12 arnaıy joba ázirlegenin aıtyp ótti.
Budan ári Qazaqstan halqy Assambleıasynyń 2025 jylǵa deıingi damý tujyrymdamasynyń jobasy qaraldy. Qatysýshylar Assambleıanyń etnomádenı birlestikterin qoǵamdyq akkredıtasııalaý jáne akkredıtteý jónindegi erejeni, sondaı-aq respýblıkalyq komıssııanyń quramyn akkredıtteýden ótkizý kestesin bekitti. Is-shara sońynda Qazaqstan halqy Assambleıasy Tóraǵasynyń «Birlik» altyn medali, «Jomart jan» tósbelgisi, QHA tóraǵasynyń «Qurmet» gramotasy men Alǵys hatyna kandıdatýralar usynyldy.
Marjan TILEÝBEK,
«Egemen Qazaqstan»
