....usynys jasaıdy
Eńbek Erine kóshe ataýy berilse
Zeınet jasynan asqannan keıin, kúsh-qaıraty qaıta tasyǵan, sóıtip 1966 jyly 70 jasqa qaraǵan shaǵynda Sosıalıstik Eńbek Eri ataǵyn ıelengen О́temis Qalnııazovtyń esimi aǵa býyn ókilderine jaqsy tanys. Eren eńbek ıesi óz zamanynda jyl saıyn ár 100 bıeden 100 qulynnan alyp ósirgen. О́tekeńniń memleketke ótkizgen jas qunandarynyń árqaısysynyń salmaǵy 345 kılogramnan aınalǵan. Sondaı-aq ol báıgege qosatyn sáıgúlik baptap ósirýdiń de maıtalmany edi.
О́.Qalnııazov 1981 jyly 84 jasynda dúnıeden ótti. Búgingi egemen elimizde de jylqy ósirýmen aınalysýǵa nıet bildirýshiler az emes. Árıne, bul qýanarlyq is. Osy oraıda hat joldaýdaǵy basty maqsatym – elimiz rýhanı jańǵyrý aıasynda jańa tarıhı kezeńge aıaq basqan tusta eńbegimen er atanǵan, ómiriniń sońyna deıin quryǵy qolynan túspegen О́temis Qalnııazovtaı tarlandarymyzdyń esimderin ulyqtaı bilgenimiz jón dep sanaımyn. Bul úshin aýdan ortalyǵy Shubarqudyqtaǵy bir kóshege onyń esimi berilse – búgingi urpaqqa úlgi-ónege bolmaq. Sondaı-aq mundaı ıgilikti de, izgi ister jastar arasyndaǵy eńbek tárbıesine de óz yqpalyn tıgize alatyny anyq.
Baqytjan ESENQULOV,
eńbek ardageri
Aqtóbe oblysy,
Temir aýdany,
Shubarqudyq aýyly
...qýanyshyn bólisedi
Múmkindigi shekteýliler baıqaýy
Semeıdegi Mádenıet saraıynda múmkindigi shekteýli jandardyń shyǵarmashylyq qabiletterin damytý, ónerge degen qushtarlyqtaryn arttyrý, qoǵamǵa kiriktirý tájirıbesin taratý maqsatynda «Eki juldyz» shyǵarmashylyq baıqaýy ótkizildi. Baıqaýǵa bıyl oblystyń 7 aýdanynan, qalanyń qoǵamdyq birlestikteri, sonymen qosa Semeı qalasynyń «Arnaýly áleýmettik qyzmetter kórsetý ortalyǵy» KMM-nen barlyǵy 22 talapkerler qatysýǵa ótinish bildirdi.
Is-shara sońynda jas erekshelikterine qaraı ár sanat boıynsha jeńimpaz juptar anyqtaldy. Semeılik Aıajan Dáýletqyzy men Daryn Aıtqazın, zaısandyq Darhan Qaseıinov bas júldeni ıelendi. Shar, Kókpekti, Zaısannan kelgen qatysýshylar 1-oryndy jeńip alsa, 2-oryndy Aıagóz, Jarma aýdandary ózara bólisti. Semeı, Úrjar, Kókpektiden qatysqan ónerpazdar 3-orynǵa ıe boldy. Shara sońynda jeńimpazdarǵa baǵaly syılyqtar men dıplom tabystalyp, merekelik dastarqan uıymdastyryldy.
Raıhan BAITILEÝOVA,
ortalyqtyń áleýmettik jumys jónindegi mamany
Semeı
...súısinis bildiredi
Túlekterdiń tartýy
«Rýhanı jańǵyrý» baǵdarlamasynyń «Atameken» jobasy aıasynda Shetpedegi B.Jumalıev atyndaǵy orta mekteptiń 50 jyldyǵy men aýdannyń 90 jyldyǵyna oraı mekteptiń túlekteri qaıyrymdy is jasady.
Mekteptiń 1968-2008 jylǵy túlekteri ózderi oqyǵan oqý ordasynyń ishi-syrtyna jańalyqtar engizdi. Atap aıtar bolsaq, mektep túlegi Aıdos Aqjanov 1,5 mln teńgege mekteptiń syrtqy kelbetin syrlap jóndese, mekteptiń 1973 jylǵy taǵy bir túlegi Álııa Sarmýrzına mekteptiń aldyna oqýshylar úshin yńǵaıly bolsyn dep tósenishter tósep, oryndyqtar qoıyp berdi. Sondaı-aq mekteptiń 1996-2002 jylǵy túlekteri 30 metrge jýyq quny 700 myń teńge bolatyn «B.Jumalıev atyndaǵy orta mektebi» degen ásem jazýyn jazyp berdi. Al mekteptiń syrtqy qorshaýyn Dýlan Jolanbekov syıǵa tartty. Jarty ǵasyrdan beri jóndeý kórmegen mekteptiń toq júıesin 1992-1993 jylǵy túlekteri Shańytbaı Qosaı men Altynbek Sársenbaev elektr júıesin tolyqtaı jańartyp, 1 mln teńge kóleminde qolushyn sozdy.
Al 1990 jylǵy túlegi, kásipker Aıdos Túıebaev mekteptiń sport zalyna 500 myń teńge kóleminde qarajatpen kómektesti. Mekteptiń jylý qubyrlary da eski edi. Bul másele de túbegeıli sheshildi. О́ıtkeni jylýdy túgeldeı jańartyp bergen 1984 jylǵy túlegi, aýyl turǵyndary Mars Úbinaev pen Jaras Ozǵanov kómektesip qoldady.
Allabergen QONARBAEV
Mańǵystaý oblysy,
Mańǵystaý aýdany
...maqtan tutady
Marapattaýǵa laıyq azamat
Memleket basshysynyń bilim salasyna qatysty basym baǵyttaryn iske asyrýda kópke úlgi kórsetip júrgen jandardyń biri Aqylbaı Qaımoldınov. О́z isin biliktilikpen oryndap júrgen ol búginde Batys Qazaqstan oblysynyń Terekti aýdanyna qarasty Podstepnyı aýylyndaǵy №1 orta mekteptiń dırektory.
Aqylbaı Asmaquly sapaly bilim, sanaly tárbıesimen shákirtterin bıikke jetelegen, el senimin aqtaǵan ardaqty ustaz. Únemi ózin ózi jetildirip, bilimin zaman talabyna saı tolyqtyryp, ujymǵa úlgi-ónege kórsetip júredi. Ásirese, oqýshylardy óz betinshe jumys isteýge úıretý ádistemesin tereńnen qaýzap, álemdik deńgeıdegi ozyq tájirıbelerdi keńinen qoldanýy onyń biliktiligin aıqyn kórsetedi. Kásibı sheberligin shyńdaý maqsatynda túrli keńesterge, semınarlarǵa, baıqaýlarǵa qatysyp, tájirıbe almasyp turatynyn da erekshe atap ótken jón. Bilim berýde ulttyq dástúrdi, qazaq halqynyń tarıhy men mádenıetin, týǵan jerge qatysty qundylyqtardy keńinen qoldanyp keledi. Osyndaı eren eńbektiń nátıjesinde shákirtteri únemi aýdandyq, oblystyq jáne respýblıkalyq pán olımpıadalary men ǵylymı jobalar saıysynda top jaryp, úzdikter qatarynan kórinip júr. Sonyń arqasynda ustazdyń da eńbegi elenip, kóptegen marapattarǵa laıyq dep tanyldy. Sonyń ishinde halyqaralyq pedagogıka jáne ınnovasııalyq tehnologııalar, ǵylym akademııasy, respýblıkalyq «Bilim jáne ǵylym» shyǵarmashylyq birlestigi jáne L.N.Gýmılev atyndaǵy Eýrazııa ulttyq ýnıversıtetiniń alǵys hattaryna ıe boldy.
Gúlsara MUQANOVA,
№1 Podstepnyı mektebiniń muǵalimi
Batys Qazaqstan oblysy,
Terekti aýdany
