Aqtaýda ótken jarystyń deńgeıi joǵary boldy. Byltyr Germanııanyń Gambýrg qalasynda uıymdastyrylǵan álemdik dodada jeńis tuǵyryna kóterilgen alty boksshymyzdyń beseýi el birinshiliginde qarsylas shydatpady. Ásirese biz 75 kılo salmaq dárejesinde kúsh synasqan Jambyl oblysynyń túlegi Ábilhan Amanquldyń asqan sheberligine tánti boldyq. Nurlan Aqúrpekovteı bilikti bapkerden tálim-tárbıe alǵan qazaqtyń ór minezdi uly barlyq qarsylasyn bet qaratpaı utyp, jeńis tuǵyrynyń eń bıik satysyna kóterildi. О́zgelerdi aıtpaǵanda, Azııa birinshiliginiń kúmis júldegerleri – Rýstam Sybaev pen Erik Áljanov, Islam yntymaqtastyǵy oıyndarynyń jeńimpazy Tursynbaı Qulahmet syndy saqa sportshylardyń ózderi Ábilhanǵa jarytyp qarsylyq kórsete almady.
Rıo Olımpıadasy men álem chempıonatynda júlde alǵan 91 kılo salmaqtaǵy qostanaılyq Vasılıı Levıt pen byltyrǵy dúnıejúzilik dodada kúmis medaldy moınyna ilgen +91 kılo salmaqtaǵy qyzylordalyq Qamshybek Qońqabaevtyń qarqyny óte kúshti boldy. Barlyq qarsylastaryn bir demmen utqan olar bas júldeni qanjyǵalaryna baılady. 56 kılo salmaqtaǵy túrkistandyq Qaırat Eralıevtiń de ózge boksshylardan basymdyǵy esh kúmán týǵyzǵan joq.
Kópshilik 69 kılo salmaq dárejesindegi qaraǵandylyq Abylaıhan Júsipov pen tarazdyq Aslanbek Shymbergenovtiń jekpe-jegin taǵatsyzdana kútti. Búgingi tańda ekeýiniń de dáýiri júrip tur. Jasóspirimder men jastar arasyndaǵy jarystarda altyn tuǵyrdan tómendemegen Abylaıhan eresekter tobyna da erkin qosyldy. Ol álem jáne Azııa chempıonattarynda atoı saldy. Aslanbek – Dúnıejúzilik boks serııasy dodasyndaǵy eń úzdik boksshylardyń biri, jazǵy Azııa oıyndarynyń kúmis júldegeri. Ekeýara tartys Júsipovtiń paıdasyna sheshildi. Báseke barysynda Abylaıhan qarsylasyn bir márte nokdaýnǵa jiberdi. Jekpe-jekten keıin Abylaıhanmen tildeskenimizde ol bul aıqasqa burynnan daıyndalǵanyn aıtty.
– Aslanbek áleýeti joǵary, tájirıbeli boksshy. 69 kıloda eki dúrkin el chempıony. Sondyqtan ony osal deýge bolmaıdy. Biz sparrıngte de óte sırek kezdestik. Sebebi ol «Astana arlandarynyń» sapynda júrgendikten, birlesip ótkizgen jattyǵýlarymyz az boldy. Al jattyǵý barysyndaǵy judyryqtasýda tolyǵymen ashylmadyq dep oılaımyn. Negizgi qarsylas bolǵandyqtan kóbine jumbaq kúıde júrdik. Biz rıngke bir-birimizdi tolyq zerttep shyqtyq. Aslanbektiń jekpe-jekterin qalt jibermeı qarap, tolyq nazarda ustadyq. Fınalda kóp qatelestim dep oılamaımyn. Aleksandr Strelnıkov meniń ekinshi bapkerim. Qazirgi salmaǵym boıynsha boksshylardy baptaýda oń nátıje kórsetip, Olımpıada chempıonyn shyǵarǵan maman. Alda birlesip jumys istep, aýyz toltyryp aıtarlyqtaı nátıjege jetemiz dep úmittenemin.
Gambýrgte ótken álem chempıonatynda júlde alǵan boksshylar arasynan tek asa jeńil salmaqtaǵy Erjan Jomart qana bas júldesiz qaldy. Jaraqatyna baılanysty ol jartylaı fınaldyq saıysqa shyqqan joq. Bul salmaqta aqmolalyq Temirtas Júsipov top jardy. Al osy jarystyń ózge jeńimpazdary mynalar: 52 kılo – Ánýar Muzafarov (Almaty oblysy), 60 kılo – Zákir Safıýllın (Shymkent qalasy), 64 kılo – Sanatáli Tóltaev (Mańǵystaý oblysy) jáne 81 kılo – Bek Nurmaǵambet (Túrkistan oblysy).
Baıyptap qarasańyzdar, bıylǵy Qazaqstan chempıonatynda top jarǵandardyń deni saqa sportshylar. Solardyń arasynda eń eresegi – Zákir Safıýllın. Ol – 32 jasta. Temirtas Júsipov pen Vasılıı Levıttiń jasy – 30-da. Qaırat Eralıev – 28, Qamshybek Qońqabaev – 27 jáne Ánýar Muzafarov – 26 jasta. Olardyń barlyǵy da osy deńgeıge ózderiniń qajyrly eńbegi men tabandylyǵynyń arqasynda qol jetkizip otyr. Aqtaýdaǵy aıqas barysynda soǵan anyq kóz jetkizdik. Al qalǵandary órimdeı jastar. Máselen, Sanatáli Tóltaev nebári 19 jasta. Bek Nurmaǵambet endi ǵana 20 jasqa tolyp otyr. Talaı dúbirli dodada daralanyp, kórermenderdiń kózaıymyna aınalyp úlgergen Abylaıhan Júsipov pen Ábilhan Amanqul 21 jasta. Sondaı-aq el birinshiliginde júldegerler qatarynan kóringen Jandos Nesipjan (49 kılo), Orazbek Asylqulov (56 kılo), Serik Temirjanov (60 kılo), Samatáli Tóltaev (60 kılo), Aman Qazanǵapov (75 kılo), Mıhaıl Kohanchık (81 kılo) jáne Aıboldy Dáýrenuly (+91 kılo) syndy jalyndy jastardyń da óneri jankúıerler kóńilinen shyqty. Jastary áli 20-ǵa da kelmegen sol saıypqyrandar erteńgi kúni el boksyn órge súıreıdi degen senimdemiz.
Jalpykomandalyq esepte Túrkistan oblysy órenderiniń kóshi ilgeri boldy. Olar 2 altyn, 3 kúmis jáne 2 qolany oljalady. Ekinshi orynda – Mańǵystaý oblysy. Rıng qojaıyndary 1 altyn, 3 kúmis jáne 4 qolany enshiledi. Úshinshi satyǵa Jambyl oblysy jaıǵasty. Tarazdyń tastúlekteri 1 altyn, 2 kúmis jáne 3 qolany ıelendi. Sondaı-aq jeńis tuǵyryna kóterilgender arasynda myna óńirlerdiń ókilderi de bar: Aqmola oblysy (1 altyn+1 kúmis+1 qola), Astana qalasy men Qyzylorda oblysy (1+0+2), Almaty men Qaraǵandy oblysy (1+0+1), Shymkent qalasy (1+0+0), Qostanaı oblysy (0+1+0), Aqtóbe oblysy (0+0+2), Pavlodar men Shyǵys Qazaqstan oblysy (0+0+1).
El chempıonatyn qorytyndylaǵan ulttyq quramanyń bas bapkeri Myrzaǵalı Aıtjanov quramadaǵy ózgerister men aldaǵy josparlaryn aıtty. «Qurama sapyna alynǵan jańa boksshylar Sáken Bıbosynov pen Orazbek Asylqulov. Taǵy bir aıta keter jaıt, quramada úshinshi nómirli bolyp júrgen boksshylar ekinshi, al tórtinshi saptaǵylar úshinshi nómir bolyp aýysyp jatyr. 81 kıloda óner kórsetken maqtanyshymyz Ádilbek Nııazymbetov bylǵary qolǵabyn shegege ildi. Onyń ornyna kelgen Bek Nurmaǵanbet bul salmaqta Ádilbektiń ornyn joqtatpaıdy dep oılaımyz. 49, 56, 75, 91 jáne asa aýyr salmaq dárejelerinde óner kórsetip júrgen sportshylar óz oryndarynda qaldy. Ulttyq quramanyń bıylǵy oqý-jattyǵýlary 6-13 jeltoqsan aralyǵynda Astanada ótedi. Sol ýaqytta Ádilbek Nııazymbetovtiń ornyna ulttyq quramanyń jańa kapıtanynyń esimi de belgili bolmaq. Keler jylǵy álem chempıonaty men Azııa birinshiligi ádettegideı 10 salmaq boıynsha ótedi», deıdi M.Aıtjanov.
Ǵalym SÚLEIMEN,
«Egemen Qazaqstan»
