Jıynda sóz alǵan ıpotekalyq «Baspana» uıymynyń basqarma tóraǵasynyń orynbasary Darhan Baıqýatov atalǵan baǵdarlamanyń búgingi tańda suranysqa ıe ekenin jetkizdi. Onyń aıtýynsha, baǵdarlamada belsendilik tanytqan óńirlerdiń kósh basynda Astana, Almaty qalalary men Mańǵystaý oblysy tur. Astana qalasynda maquldanǵan nesıe somasy 15 mıllıard teńgeden asady. Baǵdarlamaǵa qatysýshy bankter myńnan astam astanalyqtardyń ótinishin maquldaǵan. Buǵan deıin óńirlerde «7-20-25» boıynsha turǵyn úı tapshylyǵy seziletindigi aıtylǵan bolatyn. Bul máseleni «Baspana» uıymynyń basshylyǵy da rastap otyr.
Atalǵan ıpotekalyq baǵdarlamanyń talaptaryna sáıkes tek jańadan salynǵan turǵyn úıler berilýi tıis. Osy oraıda óńirlerde baspanalar sany jetispeıdi. Bul máseleni sheshý maqsatynda jergilikti atqarýshy organdarǵa 150 mıllıard teńge bólý qarastyrylǵan. Bólingen qarajatqa turǵyn úıler salý úshin kem degende 1 jarym, 2 jyl ketedi, dedi D.Baıqýatov. Onyń aıtýynsha, búginde atalǵan baǵdarlama boıynsha Halyq bank, Sentrkredıt, ATFBank, Sesnabank, Bank RBK, Eýrazııalyq bank, ForteBank nesıe beredi.
Al «Baspana» ıpotekalyq uıymy» AQ departament dırektory Qanat Abdraımov elordada 15 mln teńgeniń páterin alý úshin tabys mólsheri 160 myń teńge kóleminde bolý qajet ekenin aıtty.
− Mysaly, Astanada páterdiń baǵasy 15 mln teńge dep alaıyq. Demek, azamat aı saıyn páterge 84 613 myń teńge tóleýi qajet. Endi osy sandy ekige kóbeıtemiz, shamamen 160 myń teńge shyǵady. Bul azamattyń aı saıyn alatyn jalaqysy. Endi muǵalimniń jalaqysyn 60-80 myń teńge dep alaıyq. Astana qalasyndaǵy ortasha jalaqy mólsherin aıta almaımyn. Eger azamat páter alǵysy kelip, biraq tólem qabiletin rastaı almasa, ózge qaryz alýshyny kómekke shaqyra alady. Týysy bolý mindetti emes. Osy tabystyń kólemimen ózin baspanamen qamtamasyz etýge bolady. Osylaısha atalǵan baǵdarlamaǵa qatysa alady», dedi ol.
Aıta keterligi, baǵdarlama aıasynda, bastapqy jarnany tóleý úshin memlekettik qyzmetkerlerge ıaǵnı, muǵalimder men dárigerler jáne polısııa qyzmetkerine 1 mln teńge kóleminde sýbsıdııa berilmek. Astana qalasy boıynsha jyl sońyna deıin 100 sertıfıkat beriledi dep josparlanýda. Keler jyly bul kórsetkish 3 myńǵa jetpek. Buǵan deıin «Baspana» uıymy Shymkent qalasy ákimdigimen birge alǵashqy jobany iske qosqan bolatyn. Joba boıynsha Shymkent ákimdigi 2 myńǵa jýyq turǵynǵa qoldaý kórsetý úshin 2 mlrd teńge sýbsıdııa bólgen edi. Aldaǵy ýaqytta elimizdiń ózge óńirleri de bul izgi bastamany jalǵastyrady dep kútilýde.
Erkejan AITQAZY,
«Egemen Qazaqstan»
