Munaıly aımaq álemniń 50-den astam elimen turaqty qarym-qatynas ornatqan, sonyń nátıjesinde 1 myńnan astam birlesken jáne shetel kásiporyndary qurylyp, jumys istep jatyr. Qazan aıynda Atyraýǵa jumys saparymen kelgen Investısııalar jáne damý vıse-mınıstri Arystan Qabekenov: «Elimizdiń ınvestısııalyq saıasaty ınvestorlarǵa barynsha qolaıly jaǵdaı jasaýǵa baǵyttalǵan. О́tken jyly 20,8 mlrd AQSh dollary kóleminde ınvestısııa tartyldy. Ásirese óńdeý ónerkásibine salynǵan qarajat eselep artty. 2020 jylǵa deıin 658 ınvestısııalyq joba júzege asýy tıis», – degen edi.
Indýstrııalandyrýdyń ekinshi besjyldyǵynda da qolǵa alynǵan jobalardyń ıgiligin el kórip otyr. Endigi maqsat – elimizde keler jyly óńdeý ónerkásibi eksportynyń qundyq kólemi ósimin – 19, eńbek ónimdiligin 22 paıyzǵa ósirip, negizgi kapıtalǵa salynatyn ınvestısııa kólemin 4,5 trln teńgege jetkizý. Bul baǵytta Atyraýda qolǵa alynyp jatqan jumystardyń aýqymy keń. Negizinen munaı-gaz óndirý salasy basymdyqqa ıe bolǵanymen, qurylys, mashına jasaý, jeńil ónerkásip, tamaq ónimderin óndirý, hımııa ónerkásibi boıynsha da ilkimdi ister bar. О́ńirde basqa salalarda da jaqsy jobalar júzege asýda.
Shetel ınvestorlary Atyraý oblysyna erekshe qyzyǵýshylyq tanytady. Oblystyq máslıhattyń kezekti sessııasynda aımaq basshysy Nurlan Noǵaev 2019 jylǵa deıin 31 ınvestısııalyq joba iske asyrylyp, 3635 jańa jumys ornyn ashý kózdelip otyrǵanyn habarlady. Bul óz kezeginde óńirdiń óndiristik áleýetine tyń serpin berip, jumyssyzdyq deńgeıin tómendetýge yqpal etedi.
Oblystyq kásipkerlik jáne ındýstrııalyq-ınnovasııalyq damý basqarmasynyń basshysy Aıqyn Eleýsizovtiń aıtýynsha, bıyl qańtar-qyrkúıek aılarynda negizgi kapıtalǵa salynǵan ınvestısııalar 2 692,1 mlrd teńge bolǵan. Jyl saıyn óńir ekonomıkasyna ınvestısııa tartý maqsatynda «ATYRAU INVEST» halyqaralyq ınvestısııalyq bıznes-forýmy ótedi. Sondaı-aq, «Global Oil&Gas Atyrau» Soltústik Kaspıı aımaqtyq munaı jáne gaz kórmesi jáne «Atyrau Build» Soltústik Kaspıı aımaqtyq qurylys jáne ınterer kórmesin de jyl saıyn uıymdastyrý dástúrge aınaldy.
«Bir tereze» qaǵıdasy boıynsha aqparattyq-taldaý jáne servıstik qoldaý, otandyq jáne shetel ınvestorlaryna sapaly jáne jedel kómek kórsetý maqsatynda óńirde «Atyraý Innovations» JShS quryldy. «Kazakh Invest» UK» AQ» da osy baǵytta qyzmet kórsetip otyr. О́ńirdiń ınvestısııalyq qyzmetine baılanysty problemalyq máselelerdi jedel sheshý úshin Atyraý oblysy ákimdigimen «Investorlar tartý jáne ınvestısııalyq ahýaldy jaqsartý jónindegi» óńirlik keńes qurylǵan. Keńes quramynda memlekettik organdardyń, qoǵamdyq birlestikterdiń basshylary, sheteldik kompanııalar, shetel elshilikteriniń ókilderi bar. Munyń bári – Atyraýdaǵy ınvestısııalyq ahýaldyń turaqtylyǵyn qamtamasyz etýge baǵyttalǵan sharalar.
Baqytgúl BABASh,
«Egemen Qazaqstan»
ATYRAÝ
