Memlekettik ındýstrııalyq-ınnovasııalyq damý baǵdarlamasy aıasynda iske qosylǵan «DALA-FRUIT.KZ» JShS-nde bastapqyda 83 adam turaqty jumyspen qamtylsa, kompanııa jumysyn bastaǵan úsh jylda onyń sany 277 adamǵa jetken. Jalpy kólemi 106,5 gektar bolatyn seriktestik baýyna 215 myń túpten astam jemis aǵashtary egilgen. Munda almanyń túr-túri men shıeniń «Stenleı» atty sheteldik suryptaryn kezdestirýge bolady. Iаǵnı, 1 gekter jerge shamamen 2500 túp aǵash kósheti otyrǵyzylǵan. Zamanaýı tehnıkamen jabdyqtalǵan baý tamshylatyp sýarý júıesi arqyly jumys isteıdi.
Aqparattyq top ókilderi mekemeniń almadan shyryn shyǵaratyn sehyn, shetel naryǵyna sapaly ónim daıyndaıtyn qoımasyn aralap, kásipker Bolatbek Álıevtiń sheteldik tuqym suryptaýdaǵy ozyq úlgiler men tehnologııalardy kádege jaratqan ıgi bastamasyna rızashylyǵyn bildirdi.
Munan soń Saıramdaǵy shetel naryǵyna et eksporttaıtyn «Nurym grýpp» bordaqylaý alańynda bolǵan vedomstvo basshysy soıys maldyń basyn kóbeıtip, iri sharýa qojalyqtaryn, onyń ishinde qoı bordaqylaý alańdaryn arttyrýdy tapsyrdy.
«Qazirdiń ózinde Qytaı naryǵy kóptegen aýylsharýashylyq ónimderine (balyq ónimi, asyl tuqymdy jylqylar, muzdatylǵan qoı eti, bal, bıdaı, bıdaı kebegi, soıa burshaǵy, soıylatyn jylqylar, raps kúnjarasy, sıyr eti, jońyshqa, un, ósimdik maıy) endep keledi. Iran tarapymen qoıdy, tońazytylǵan ári salqyndatylǵan qoı etin, sıyr etin, taǵamdyq jumyrtqany jetkizýge arnalǵan veterınarlyq talaptar kelisildi. Al bıyl tirideı iri qaraǵa qoıylatyn talaptardy kelisý josparlanyp otyr. Sondaı-aq iri qarany jáne usaq maldy Saýd Arabııasy men Birikken Arab Ámirlikterine, et pen et ónimderin, taýyq jumyrtqasyn Birikken Arab Ámirlikterine jetkizýge qoıylǵan shekteýler alyndy. Et jáne sútti iri qara mal, qus, sýarmaly jerlerdi damytý boıynsha uzaq merzimdi salalyq baǵdarlamalar ázirlendi. Salalyq baǵdarlamalardyń sharalary men kórsetkishteri aımaqtyq baǵdarlamalarda kórinis tabady. Iri ınvestısııalyq jobalardy iske asyrý bastaldy. Ultaralyq kompanııalardy eksporttyq naryqtarmen Qazaqstannyń agroónerkásip keshenine tartý olardyń kapıtalǵa ǵana emes, sondaı-aq jańa óndiris pen tehnologııalardy ınvestısııalaýyna, jańa basqarý tásilderin engizýge jáne tanymal álemdik brendterdiń belgisimen aýyl sharýashylyǵy ónimderin eksporttaýǵa múmkindik beredi», dedi О́.Shókeev.
«Nurym grýpp» keshendi mal bordaqylaý alańy mamandarynyń aıtýynsha, jyl basynan beri О́zbekstanǵa 800 tonna, Iranǵa 200 tonna et jóneltildi.
Aqparattyq-nasıhattyq toptyń sapary Shymkent qalasynda qorytyndylandy. О́.Shókeev Elbasynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýyn túsindirý maqsatynda qala aktıvimen kezdesti.
Búginde Joldaýda kórsetilgen mindetterdi oryndaý maqsatynda Shymkent qalasynda birqatar jumys atqarylyp jatqanyn aıtqan qala basshysy Ǵabıdolla Ábdirahymov aldaǵy ýaqytta «Shymkent» agroındýstrııalyq aımaǵy qurylatynyn jetkizdi. Jobada agrarlyq sektordy ekonomıkanyń jańa qozǵaýshy kúshterine aınaldyrý qajettigi eskeriletin bolady. Oǵan 20 mlrd teńge jeke ınvestısııa tartylyp, 40 kásiporyn ashý josparlanýda. Nátıjesinde Shymkentte búkil ońtústikte ósetin aýylsharýashylyq ónimin óńdeıtin klaster qurylyp, 2022 jyly aýylsharýashylyq óniminiń kólemi 67,5 mlrd teńgege jetkizilmek.
«Aýylsharýashylyq óndiristik keshenin qoldaýdyń josparlanǵan sharalary úsh blokqa bólinýi múmkin: júıe, ındýstrııa jáne naqty ınvestısııalyq jobalar. О́nerkásip memlekettik tetikter jetildirilip, memlekettik qoldaý kólemi artady. Sondaı-aq tıimsiz sýbsıdııalardy qysqartý josparlanýda. Bosaıtyn qarajat nesıeler men lızıng boıynsha syıaqy mólsherlemesin, birinshi kezekte fermerlerdi tehnıkalyq jáne tehnologııalyq qaıta jaraqtandyrýǵa arnalǵan ınvestısııalyq sýbsıdııalardy azaıtý úshin paıdalanylatyn bolady», dedi sala basshysy.
Nurshat TО́KEN,
«Egemen Qazaqstan»
Túrkistan oblysy
