Kórmege sýretshiniń peızaj janryndaǵy 75-ke jýyq týyndysy qoıyldy. Serikjan Ysqaqbekulynyń natýrasyndaǵy peızajdyq etıýdtaryna adam men tabıǵattyń ajyramas birligi arqaý etilgen. Ásirese keskindemeshi nazaryna kók aspan men asqaraly shyń bıikteri kóbirek ilikkenin baıqar edińiz.
– Meniń shyǵarmalarymda keń-baıtaq dalamyzdyń darhandyǵy men keńdigin jyrlaǵan tabıǵat kórinisteri basym keledi. О́ıtkeni ózim aýylda týyp-ósken soń ba, asqar taýlar men bıik shyńdardy salýǵa erekshe qushtarmyn, – deıdi sýretshiniń ózi.
Jalpy peızajdyń derbes janr retinde Qytaıda XV ǵasyrda paıda bolǵandyǵy aıtylady. Aqyndyq shabyt basym keletin qytaı sýretshileriniń keskindemesindegi keńistik munartqan tumanmen ulasyp jatatyn sheksizdikke negizdeledi. Al Serikjannyń keskindemelik týyndylaryndaǵy sheksizdikke balanatyn aspan birde áne-mine jaýardaı bolyp túnerip tóbeńnen tónse, birde ushy-qıyry joq kókjıekpen momaqan astasyp jatady. Sýretshiniń sezimi, kóńil kúıi, tabıǵatqa degen kózqarasy aıryqsha kórinetin «Boıaýǵa sińgen bozdala», «Ystyqkól», «Úshqoz aýyly», «Qara jon», «Lapas úı» kartınalary sýretshi shyǵarmashylyǵyndaǵy shoqtyǵy bıik týyndylar. «Lapas úı» týyndysynda oınaqy jyly tústerdiń ózara baılanysy mamyrajaı kóńil kúı týdyrady. Kompozısııa qurylymy ortalyq bólikke negizdelip, aıqara ashyq jatqan esikten birden ishke kózińiz túsedi. Murnyńyzǵa qyshqyltym qurt ıisi kelgendeı me, álde qazan-oshaqtyń mańynda uzaqty kún kúıbeńdep apańyz júrgendeı me, áıteýir dál bala kúngideı qamsyz qarap turǵandaı bolasyń.
– Peızaj qandaı da bir jerdi aınytpaı beıneleı salý emes, onda sýretshiniń ishki tolǵanysyn berýdiń tamasha múmkindigi jatyr. Tabıǵat óte qubylmaly, sol sátti ustap qalý úshin baryńdy salyp, ystyqqa kúıip, sýyqqa tońasyń. Al salǵan sýretiń tamasha shyǵyp jatsa barlyq qıyndyqty umytyp, kóńilińiz jadyrap ketedi. Bul rette Ystyqkólge sapar kezinde salynǵan kompozısııalarymdy erekshe aıtar edim, – deıdi Serikjan.
1978 jyly Qytaıdyń Ile-qazaq avtonomııaly oblysyna qaraıtyn Keńsý aýylynda týǵan Serikjan Shyńjań kórkemóner akademııasynyń sýret fakýltetinde oqyǵan. «Ymyrt» atty jumysy Qytaı ulttyq mýzeıiniń «Altyn qoryna» saqtalǵan.
Aıa О́MIRTAI,
«Egemen Qazaqstan»
