Fýtbol • 29 Qarasha, 2018

«Astana» – «Dınamo»: sońǵy týr aldyndaǵy sheshýshi match

200 retkórsetildi

Búgin ÝEFA Eýropa lıgasynyń toptyq kezeńdegi besinshi týr oıyndary oınalady. Bul týrda elordanyń «Astana» komandasy óz alańynda Ýkraınanyń «Dınamo» (Kıev) klýbyn qabyldaıdy. Eger jerlesterimiz búgingi kezdesýde jeńiske jetetin bolsa, toptan birinshi orynmen shyǵýǵa múmkindik týady. Al eger teń nátıje tirkelip nemese jeńilip qalatyn bolsa bar másele sońǵy týrada sheshilmek.

Keshegi Keńes odaǵy tusynda búkil Eýropaǵa tanymal bolǵan Kıevtiń «Dınamo» komandasy osymen Qazaqstanǵa ekinshi ret keldi. Buǵan deıin «Dınamo» Eýropa lıgasynyń 2013/14 jylǵy maýsymynda «Aqtóbemen» toptyq kezeńge joldama beretin pleı-off básekesinde kezdesip, eki oıynnyń qorytyndysy boıynsha 8:3 esebimen jeńiske jetken.

Jetinshi jyl qatarynan Eýropa lıgasynda dop teýip jatqan «Dınamo» alty ret toptyq kezeńde, sońǵy 5 maýsymda tórt ret pleı-offqa deıin jetken. Al besinshi ret Eýropa lıgasynda oınap jatqan «Astana» komandasy osymen úshinshi jyl qatarynan toptyq kezeńde óner kórsetip keledi. Byltyrǵy maýsymda tarıhta tuńǵysh ret pleı-off kezeńge shyqqan bolatyn. Bıyl sol jetistikti qaıtalaýǵa tamasha múmkindik týyp tur. Ol úshin «Astana» búgingi oıynda qalaı da jeńiske jetýi kerek.

Toptyq kezeńniń alǵashqy týrynda «Astana» syrt alańda «Dınamomen» oınap, 2:2 esebimen teń tústi. Qazaqstan komandasynyń oıynshysy Roman Murtazaev tóreshi qosqan qosymsha mınýtta gol soǵyp, komandasyna mańyzdy bir upaı syılady. Syrt alańdaǵy teń oınap, maýsymdy kóterińki kóńil-kúımen bastaǵan «Astana» keıingi úsh oıynda da upaı ıelendi. Ekinshi týrda óz alańynda «Renndi» (2:0) jeńse, syrt alańda «Iаblonespen» teń túsip (1:1), Astanadaǵy oıynda 2:1 esebimen jeńiske jetti.

«Dınamo» Eýropa lıgasynyń toptyq kezeńindegi alǵashqy eki oıyndy da 2:2 esebimen aıaqtady. Odan soń, «Renniń» osal tusyn tapty. Fransııada – 2:1, Kıevte – 3:1 esebimen basym tústi. Búgingi oıynda Kıev komandasyna toptan shyǵý úshin teń nátıje de jetkilikti. Eger, jeńip jatsa, K tobynyń kóshin bastaıdy.

Sondyqtan búgingi oıynda negizgi salmaq shabýylshylar men qorǵaýshylarǵa túspek. Jazǵy transfer maýsymynda «Astanaǵa» qaıta oralǵan Kongolyq shabýylshy Djýnıor Kabananga búginge deıin 15 oıyn ótkizip, áli birde-bir ret mergendigimen kózge túsken joq. Degenmen Eýropa lıgasynyń toptyq kezeńindegi eki nátıjeli pas asyryp, komandasynyń jeńiske jetýge óz úlesin qosty. Qazaqstannyń úsh márte úzdik surmergeni atanǵan, qazirgi tańda «Shahter» fýtbol klýbynyń sport dırektory Murat Tileshevtiń aıtýynsha, Kabananga gol soqpasa da, komandaǵa kóp paıdasyn tıgizip júrgen kórinedi. «Jýnıor gol soqpasa da, komandasyna bir kisideı-aq kómektesip júr. Árıne, shabýylshylarda keıde ondaı sátsizdikter bolady. Meniń oıymsha, Kabananga ózine degen senimdigin qaıta keltirýi úshin bir gol soǵýy kerek. Sodan keıin, barlyǵy óz jolyna túsedi degen oıdamyn. Kongolyq shabýylshy óz goldaryn Eýropa lıgasy aıasyndaǵy «Dınamo» men «Rennge» qarsy oıyndarǵa saqtap qaldy degen úmittemin», deıdi M.Tileshov.

Al 2007 jyly «Altyn dopty» ıelegen ýkraınalyq ataqty fýtbolshy, qazirgi tańda fýtboldan Ýkraına quramasynyń bas bapkeri bolyp júrgen Andreı Shevchenkonyń pikirinshe, aldaǵy oıyn toptyń jeńimpazyn anyqtaıtyndyqtan, eki komandaǵa da ońaıǵa soqpaıdy. «Kıevtegi oıyn eki terezesi teń qarsylastyń teke-tiresi boldy. «Dınamo» oıynshylary oıyn basymdyǵyna ıe bolyp, tipti, esepte alda turǵanymen, qonaq komanda ókilderi sońǵy sátte jınaqy oınaı bildi. Osy kezdesýden keıin eki komanda ókilderiniń laıyqty qorytyndy shyǵarǵany sońǵy oıyndarynda kórindi», deıdi ol.

K tobynyń birinshi komandasyn anyqtaıtyn eki komanda arasyndaǵy kezdesý búgin saǵat 20:50-de bastalady. Oıyndy QAZSPORT telearnasy tikeleı efırde kórsetedi.

Álı BITО́RE,

«Egemen Qazaqstan»

Sońǵy jańalyqtar

Kógildir ekranda – jańa melodramma

Rýhanııat • Búgin, 18:04

Salyq salmaq salmaıdy

Qarjy • Búgin, 17:50

MÁMS boıynsha jeńildik merzimi uzartyldy

Medısına • Búgin, 17:45

Betperde kıgen kóktem - 3

Tanym • Búgin, 17:30

Qazaq operatory Týrınde bas júlde aldy

Qazaqstan • Búgin, 17:29

Atyraý: Úsh adamnan koronavırýs tabyldy

Koronavırýs • Búgin, 17:18

Kóktem - órttiń órshıtin shaǵy

Aımaqtar • Búgin, 16:32

Indeksasııa qalaı júrgiziledi?

Qarjy • Búgin, 16:23

Uqsas jańalyqtar