Qostanaı polıtehnıkalyq kolledjiniń volonterleri áıelderge jasalatyn zorlyq-zombylyqqa ózderiniń qarsylyǵyn fleshmob arqyly bildirdi. Qyzdar men jigitter «áıelderge zorlyq-zombylyqsyz 16 kún!» atty respýblıkalyq aksııasyn osylaısha qoldady.
Stýdentter bul sharaǵa tııanaqty daıyndaldy. «Áıelderge zorlyq-zombylyq toqtatylsyn!» degen plakat jazyp alyp shyqty. Fleshmobtyń bı qımyldaryn úırendi. Stýdentterge mundaı bastamany áıelderdi jábirleýden qorǵap júrgen polıseıler berdi.
«Bıyl bizdiń aksııaǵa turmystyq ozbyrlyq, zorlyqqa qarsy jigitter qyzdarmen birdeı atsalysty. Bul qýantady. Bolashaq otbasyn quratyn jas jigitter muny túsinedi. Sońǵy ýaqytta er kisiler áıelderdi jábirleýge qarsylyǵyn, osyndaı sharaǵa oń kózqarasyn bildiredi» deıdi Qostanaı qalalyq polısııa basqarmasynyń qyzmetkeri Gúlzada Kenjebaeva. Polıseıler uryp-soǵyp, kúsh kórsetýden qostanaılyq áıelder qorǵalǵandyǵyn aıtady. Qalada daǵdarys ortalyǵy bar, ondaǵy mamandar salaýatty ómir saltyn qurýdy nasıhattap, psıhologııalyq kómegin de beredi.
Fleshmobtan keıin belsendiler oıyn-saýyq ortalyǵyna kelýshilerge áıelderdi zorlyq-zombylyqtan qorǵaıtyn daǵdarys ortalyǵynyń telefondary men meken-jaıy jazylǵan býkletterdi taratty.
Názıra JÁRIMBET,
«Egemen Qazaqstan»
Qostanaı
