Oıynnyń 29-mınýtynda «Dınamo» jartylaı qorǵaýshysy Benıamın Verbıch gol soǵyp, komandasyn jeńiske jeteledi.
Áıtse de, birinshi taımda «Astana» klýbynyń oıynshylary shıraq óner kórsetti. Elordalyqtar úsh márte urymtal tusqa shyqqanymen, sońǵy sátte múlt ketti.
Ekinshi taımda da komandalar alma-kezek shabýyldaǵan. Matchtyń 82-mınýtynda astanalyq Dmıtrıı Shomko tepken dop qaqpa baǵanasynan keri serpildi. Budan keıin qaýipti sát bolǵan joq.
Osylaısha, «Astana» bıylǵy Eýropa lıgasynyń toptyq kezeńinde tuńǵysh ret jeńildi. Bes týrdan keıin «Dınamo» 11 upaımen top bastasa, elordalyqtar 8 upaımen ekinshi orynda tur.
Aıta ketý kerek, K tobyndaǵy ekinshi oıynda «Iаblones»(Chehııa) pen «Renn»(Fransııa) kezdesedi. Match Astana ýaqyty boıynsha 02:00-de bastalady. Alda-jalda oıyn teń aıaqtalsa, «Astana» kelesi kezeńge tikeleı joldama alady.
Sońǵy týrda «Astana» syrt alańda «Rennmen» sheberlik baıqassa, «Dınamo» men «Iаblones» kúsh synasady.
