Basqosý barysynda Úkimet basshysy Baqytjan Saǵyntaev forýmnyń mańyzdylyǵyna toqtalyp, elimizde atqarylyp jatqan jumystardy tilge tıek etti.
«Biz eńbek naryǵynyń bolashaǵyna qatysty barlyq saraptamalardy muqııat qadaǵalap otyramyz jáne Dúnıejúzilik banktiń, EYDU, Dúnıejúzilik ekonomıkalyq forýmnyń, Azııa damý bankiniń baıandamalarymen tanyspyn. Shynymen de, jahandyq tehnologııalyq órleý adam kapıtalynyń sapasyna, jumys kúshiniń biliktiligi men quzyretine jańa talaptar qoıyp, eńbek naryǵynda jańalyqtar paıda bolýda. Birinshiden, Indýstrııa 4.0, «aýqymdy derekter», jasandy ıntellekt jáne robot tehnıka sııaqty sıfrlandyrý men tehnologııalardyń qarqyndy damýy jumys oryndarynyń qurylymyn ózgertýde. Sarapshylardyń baǵalaýynsha, 2025 jylǵa deıin shamamen jumys oryndarynyń 4% nemese 140 mln-y joıylyp ketýi múmkin. Al 80-90% nemese shamamen 3 mlrd jumys orny kúrdelene túspek. Burynǵy kásipterdiń joıylyp, jańa kásipterdiń kúrdelenýi úkimetterdiń kún tártibine avtomattandyrý nátıjesinde joıylǵan jumys oryndarynyń ornyn toltyrý, óz elderindegi eńbek resýrstarynyń jańa daǵdylardy ıgerý ıkemdiligin qamtamasyz etý máselelerin qoıyp otyr. Ekinshiden, tehnologııalar men ınnovasııalar jańa kásipter men salalardyń paıda bolýyna, demek, jańa jumys oryndarynyń ashylýyna sep bolady. Boljam boıynsha, jahandyq eńbek naryǵyndaǵy jumys oryndarynyń shamamen 10% (nemese 350 mln) jańa kásip túrinde usynylady. Olar dástúrli salalar men ınnovasııalar toǵysynda paıda bolmaq. Úshinshiden, jahandaný jáne tehnologııalyq progress gıg-ekonomıkanyń damýyna ákele jatyr, ol qazirdiń ózinde jumyspen qamtýdyń, ózin-ózi jumyspen qamtýdyń neǵurlym ıkemdi formalaryn jáne eńbek naryǵyna halyqtyń áljýaz toptaryn barynsha tartýdy talap etýde. Eńbek naryǵy ózgerýde. Bylaısha aıtqanda, «frılanserlerdiń» sany artyp keledi. Jartylaı nemese ýaqyty yńǵaıly jumyspen qamtý, birlesip jumys isteý, úıde otyryp jumys isteý, jyldyq saǵattar kólemi sııaqty jańa formattar keńeıýde, dedi B.Saǵyntaev. Úkimettiń josparlaýynsha, aldaǵy
7 jylda ulttyq eńbek naryǵyna kolledjder men ýnıversıtetterdiń 2 mıllıonǵa jýyq túlekteri shyǵýy múmkin. Olardy sapaly jumys ornymen qamtamasyz etý qajet. Sondyqtan 2025 jylǵa qaraı bir mıllıonǵa jýyq jumys ornyn qurý boıynsha jumystar atqarylýda. Bul úshin jobalyq basqarý engizildi, bazalyq salalarda ǵana emes, óndiristerdi avtomattandyrý jáne sıfrlandyrý, ónerkásipte Indýstrııa 4.0 elementterin engizý, jańa perspektıvaly salalar men servıstik ekonomıkany qurý turǵysynda da jumys oryndary qurylyp jatyr. Ekinshiden, Úkimet Eńbek resýrstaryn boljaýdyń ulttyq júıesin engizdi. Onyń basty mindeti – jumys kúshine degen suranys pen usynysty aldyn ala baǵalaý, mamandardyń qajettiligin anyqtaý jáne olardy daıarlaý, qaıta daıarlaý úshin júıe qurý. Úshinshiden, tehnologııalyq jańǵyrtý nátıjesinde bosap qalatyn eńbek resýrstarynyń aǵynyn basqarý tetigi engizildi. Barlyq óńirlerde iri kásiporyndarmen jumys júrgizilýde.
Sonymen qatar eńbek naryǵynyń ıkemdiligin arttyrý úshin 2018 jyldyń 1 qańtarynan bastap elimizdegi alǵashqy sıfrly alań jáne eń úlken bos jumys oryndary men rezıýmeler qory – Elektrondy eńbek bırjasy engizilmek.
«Oǵan barlyq 200 memlekettik jáne 48 jeke jumyspen qamtý agenttigi, sonymen qatar birqatar BAQ pen onlaın-alańdar qosylǵan. Jumyspen qamtýdy qamtamasyz etý jáne jumys oryndaryn ashý maqsatynda Úkimet jappaı kásipkerlikti damytý baǵdarlamasyn júzege asyrýda. 2017 jyldyń basynan beri bul maqsatqa 190 mlrd teńge bólingen. Bul 1 mln-nan astam adamnyń, onyń ishinde bıyl 430 myń adamnyń jumyspen qamtylýyna múmkindik berdi. Bul jumystar jalǵastyrylady dedi B.Saǵyntaev.
Forým barysynda halyqaralyq uıymdardyń ókilderi eńbek naryǵyna ózgerister ákelip jatqan jahandyq betalystar jaıly aqparat berdi. Álemdik tájirıbesi mol sarapshylar trendterdiń damyǵan jáne damýshy ekonomıkalarǵa yqpal etýindegi aıyrmashylyq jaıly áńgimeledi. Damyǵan jáne damýshy elderdiń tájirıbesi negizinde jumysbastylyq, bilim berý jáne durys áleýmettik qorǵaýdy qamtamasyz etý salasyndaǵy ózgeristerdi basqarý boıynsha josparlar men tájirıbeler tanystyryldy.
Raýan QAIDAR,
«Egemen Qazaqstan»
