Biz Nurjan týraly «Egemende» 2015 jyly qańtar aıynda «Páter alǵan kúni Elbasyna hat jazamyn...» degen maqalamyzda jazǵan edik. Onda N.Mýrsalımovtiń ata-anasy Ramazan men Qaýııanyń úı kezeginde 1992 jyldan beri turyp kele jatqandary aıtylǵan-tyn. Oblys ortalyǵynda páter jaldap turǵan otbasy uzaq jyl boıy úıimiz bolsa degen úmitpen ómir súrdi. Tipti turǵan úı kezekteriniń qujattary da oblys ortalyǵyndaǵy Indýstrııalyq aýdany taraǵan kezde joǵalyp ketipti. Biraq otbasy úmitterin úzbeıdi. Nesibe ákeler jaqsy bir kúnniń bolaryna senedi. Páterden páterge kóship júrse de Merýert, Qarlyǵash atty eki qyz ben Narıman, Baýyrjan, Nurjan esimdi úsh uldy dúnıege ákeldi...
...2007 jyly Elbasy Nursultan Nazarbaev jumys saparymen Pavlodarǵa keldi. Jumys saparynyń sońynda oblys ortalyǵyndaǵy jańadan ashylǵan №10 balabaqshany aralap kórdi. Elbasy balabaqshaǵa kelgende kishkentaı Nurjan Ramazanuly kompıýter arqyly qazaqy uǵymdar tizbelerin jasap kórsetip berdi. Sol jolǵy maqalada biz: «Kishkentaı kompıýtershi bala Nurjan erjetti, oblys ortalyǵyndaǵy №19 mekteptiń 7 synybynda oqyp júr. Elbasy rızalyǵyn, batasyn alǵan bala. Talapty, zerek oqýshy. Qazir osy Nurjan ósip kele jatqan otbasy oblys ortalyǵyndaǵy páter kezeginde 71-shi bolyp tur eken. Áne-mine deýmen, kútýmen, sheneýnikterdiń ýádesine senýmen keledi. Ylǵı keıin shegerile bergen ǵoı. Úı kezegine 1992 jyldan beri turǵannan sanasaq, 20 jyldan asyp ketipti.
«Áke-sheshemniń talaı jyl boıy sarylyp ázer jetken 71-shi kezegi taǵy da keıin shegerilip tastalmasa eken, bıyl páter alsaq, qýanyshymdy aıtyp Elbasyna hat jazar edim», degen edi sonda Nurjan.
Qazir Mýsalımovterdiń kópbalaly otbasy oblys ortalyǵyndaǵy jańa salynǵan úıdegi 3 bólmeli páterde turyp jatyr. «Árıne páter alǵan kúni Elbasyna hat jazdyq. «Egemen» gazetine rahmet! Meniń ata-anam, men jaıly jazdyńyzdar. Bul meniń ómirimdegi umytylmas qýanyshtar ǵoı! Kishkentaı kúnimde kórgen Elbasynyń batasy ómir jolyma joldama bergendeı. Bul sýret árqashanda menimen birge», deıdi N.Mýrsalımov.
Mektep bitirgen soń Máskeýdegi M.V.Lomonosov atyndaǵy memlekettik ýnıversıtetke oqýǵa tússem deıdi ol. Sáttilik tileımiz saǵan, Nurjan!
Farıda BYQAI,
«Egemen Qazaqstan»
PAVLODAR
Sýrette: Elbasy Pavlodarǵa kelgende. 2007 jyl. Kishkentaı Nurjan Mýrsalımov kompıýterde.
