«Joǵary tehnologııalar álemdi kóz ilespes jyldamdyqpen ózgertip jatyr. Memleketterdiń eńbek naryǵyndaǵy básekege qabilettiliginiń basty krıterıi – ınnovasııa. Osy oraıda elimizde úlken jumys atqarylýda. Qazaqstannyń ınnovasııalyq áleýeti joǵary jáne múmkindigimizdiń óz deńgeıinde baǵalanbaı jatqanyn da baıqap otyrmyz. Bizdiń elde talantty jáne jasampaz jastar jetkilikti. Qazaqstan – álem boıynsha saýattylyq deńgeıi joǵary memleketterdiń biri. Táýelsizdik jyldarynda biz básekege qabiletti oqý oryndaryn qurdyq. Al búgin osy áleýetimizdi naqty óndiriste synaıtyn ýaqyt jetti», dedi Aqparat jáne kommýnıkasııalar mınıstrliginiń jaýapty hatshysy Janat Qojahmetov.
Jaýapty hatshynyń aıtýynsha, shilde aıynda elde venchýrly qarjylandyrý týraly zań qabyldanyp, sheteldik jumys kúshi úshin vızalyq jáne eńbek rejımi barynsha ońaılatyldy. «Aldaǵy ýaqytta Astana Hub qatysýshylaryna salyqtyq jeńildikter jasalady. Jyl sońyna deıin osy bastamalardyń barlyǵy zańdy kúshine enedi dep úmittenemiz», dedi J.Qojahmetov.
Qazirdiń ózinde AQSh pen TMD elderiniń ınnovasııalyq ortalyqtarymen áriptestik ornatyp úlgergen habta 150-den astam top jumys istep jatyr. Aqparat jáne kommýnıkasııalar mınıstrliginiń habarlaýynsha, 2022 jylǵa deıin startaptar alańyna tartylatyn ınvestısııa kólemin 67 mlrd teńgege jetkizý josparlanǵan. Bul óz kezeginde otandyq ekonomıkany jańasha túrlendirip, eldiń eksporttyq áleýetin arttyrýǵa yqpal etpek.
Sharanyń sońynda sheteldik dıplomattar Astana Hub-taǵy startapshylarmen suhbattasyp, alańnyń jumysymen keńinen tanysty. О́z kezeginde hab ókilderi tek otandyq emes, kez kelgen sheteldik IT-startapshylardyń Astanaǵa kelip, óziniń ıdeıasyn júzege asyra alatynyn, ol úshin hab basshylyǵy tegin keńse men qural jabdyqtan bastap ınvestor tabýǵa deıin kómektesetinin aıtty.
Baýyrjan MUQAN,
«Egemen Qazaqstan»
