Sádýaqas Omarulynyń aıtýyna qaraǵanda, osy jyldary Shamalǵan orta mektebinde asa bilikti muǵalimder jumys istepti. Tipti aǵaıyndy Shámenovter deıtin biri – matematıka, ekinshisi – medısına ǵylymdarynyń doktory ataǵy bar aǵaly-inili adamdar bıologııa jáne matematıka páni boıynsha orta mektepte ustazdyq etken eken. «Orta mektepte ǵylym doktorlarynyń sabaq berýi qalaı?» degen bizdiń suraǵymyzǵa Sádýaqas aǵamyz: – 1937-1938 jyldary qazaq zııalylarynyń deni halyq jaýy retinde atyldy nemese ártúrli jaza júktedi. Odan aman qalǵandary Almaty qalasynan qýylyp, astanadan 30-50 shaqyrym alys turýǵa úkim etildi. Osy úkim boıynsha Shámenovter bizdiń aýylǵa ornalasqan kórinedi. Al myna fotodaǵy Jylqybaı ustaz da dál osylaı jer aýdarylǵan zııaly bolatyn, – dedi.
Odan keıin Nursultan Ábishulynyń artynda turǵan synyptasy – Qasym Jurynbaev. Bul jigittiń qatarlastarynan eki jas úlkendigi bar eken. Erterek dúnıeden ótipti. Ortadaǵy qyz Zeınep Jaqaeva. Bul da Nurekeńnen úsh jas úlken, 1937 jyly týypty. Keıin býhgalter mamandyǵyn oqyp, uzaq jyl taban aýdarmaı aýylda qyzmet atqarǵan. Qazir Almaty oblysy, Qarasaı aýdany Jandosov aýylynda turyp jatyr.
Sýrettegi shette turǵan bozbala – Sádýaqas aǵamyzdyń ózi. Sákeń Elbasynyń estelikterinde «eń jaqyn dosy» retinde baıandalady. Ekinshi taraptan bul kisi Ábish ata men Áljan ananyń ókil balasy retinde Elbasymen bir shańyraqta tel ósken eken. – 1953 jyldyń bir kúni, – deıdi Sákeń. – Bizdiń úıge Ábish atamyz ben Áljan anamyz kelip, «Sádýaqas qaraǵym, ákeń Omar 1942 jyly soǵysqa attanarda bizge kelip, myna fashıstiń qarqyny qatty, men osy ketkennen qaıta oralmaımyn, sizderge aıtarym «jalǵyz ulym Sádýaqasqa qamqor bolyńdar» dep seni amanattaǵan-tyn», dep 13 jastaǵy meni ókil bala qylyp aldy. Sóıtip men osy kisilerdiń qamqorlyǵynda bolyp, Sultanmen (Nursultandy aıtady) taı-qulyndaı tebisip birge óstim. Keıin Ábish ata úıiniń irgesinen oryn berip, ol jerge qaryndasym ekeýmiz samannan úı turǵyzyp aldyq. Úıdi salýǵa Ýkraınada oqyp júrgen Nursultan dosym kelip kómektesti. Bertinde osy oqıǵa jaıly gazetterge «Sultan salysqan Sádýaqas úıi» degen maqala shyǵyp, ol jazba keıin bir kitapqa endi. Bul foto 8-synyp bitirgen jyly túsken sýretimiz. Nursultan ekeýmizdi Áljan ana dúkenge ertip baryp, birdeı etip kóılek alyp berdi. Myna fotodaǵy Nurekeń ekeýmiz qatar kıip turǵan qarajolaqty kóılek osy anamyz syılaǵan buıym.
Beken QAIRATULY,
«Egemen Qazaqstan»
