Jınaqta Qazaqstan Respýblıkasynyń Tuńǵysh Prezıdenti Nursultan Nazarbaevtyń táýelsizdik jyldary atqarǵan ulan-ǵaıyr eńbeginiń aıasy men aýqymy keńinen baıandalady. Shırek ǵasyrdan astam ýaqytta el bolashaǵyn kóksegen mereıli murattar júzege asyryldy. Elbasynyń álemdegi zor abyroıy men bedeli sózsiz asqaqtap tur. Sarabdal saıasatker ekendigin tórtkúl dúnıe tegis moıyndaǵan. Mine, osyndaı keleli taqyryptardy kelistire jazǵan qalamgerdiń ár jyldary qalamynan týǵan oı-tolǵamdary men paıymdy pikirleri toptastyrylǵan qundy jınaqty qalyń oqyrman joǵary baǵalaýda.
Tusaýkeser rásiminde oblys ákiminiń orynbasary Aına Mysyrálimova, oblystyq ardagerler keńesiniń tóraǵasy Ǵosman Tóleǵul, Sh.Ýálıhanov atyndaǵy Kókshetaý memlekettik ýnıversıtetiniń rektory Marat Syrlybaev jáne basqa da belgili azamattar jyly lebizderin bildirdi. Dál osyndaı tusaýkeser joǵaryda atalǵan ýnıversıtette de ótkizildi. Elbasynyń taǵdyry el taǵdyrymen egiz. Endeshe, stýdentter qaýymy úshin taptyrmas olja. Osy jınaq arqyly egemendi elimizdiń ýyq-keregesin bekitý jolyndaǵy Elbasynyń sińirgen eńbegin tolyq bilýge bolady.
Bul jınaq – táýelsizdik kezeńiniń shejiresi. Osy taqyrypty óz shyǵarmashylyǵynyń ózegi etip kele jatqan belgili qalamger Elbasymyz Nursultan Nazarbaev júrgizip otyrǵan ishki jáne syrtqy saıasat syrlaryn, eldiń birligi men tynyshtyǵyn saqtaý jolyndaǵy tarıhı mańyzy zor ǵajaıyp eńbegin ashyp kórsetken. Sondyqtan da, bul jınaqqa kez-kelgen oqyrmannyń qyzyǵýy ábden zańdy.
Baıqal BAIÁDIL,
«Egemen Qazaqstan»
Aqmola oblysy
