Oǵan elimizdiń jol qurylysy salasyndaǵy jaýapty tulǵalardyń barlyǵy shaqyryldy. Konferensııa jumysyna Memlekettik qyzmet jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev pen oblys ákimi Arhımed Muhambetov, «Nur Otan» partııasynyń hatshysy Ilıa Terenchenko, Investısııa jáne damý mınıstrliginiń Avtomobıl joldary komıtetiniń tóraǵasy Mereke Pishembaev, Prezıdent janyndaǵy memlekettik basqarý akademııasynyń rektory Fatıma Jaqypova, «QazAvtoJol» UK» AQ basqarmasynyń tóraǵasy Ermek Qızatov, «Atameken» ulttyq kásipkerler palatasynyń basqarma tóraǵasynyń orynbasary Rústem Júrsinov qatysty. Negizi bul taqyrypty talqylaýǵa Memlekettik qyzmet jáne sybaılas jemqorlyqqa qarsy is-qımyl agenttiginiń Qostanaı oblysy boıynsha departamenti bastama kótergen bolatyn. Oǵan «QazAvtoJol» AQ men Qostanaı oblysynyń ákimıaty qoldaý kórsetti.
Qazaqstanda avtomobıl joldarynyń iri kólik jobasy – halyqaralyq tranzıttik dálizi sanalatyn «Batys Eýropa – Batys Qytaı» jolyn salý isi júzege asty. Joldyń uzyndyǵy 8445 shaqyrym, sonyń 2787 shaqyrymy Qazaqstannan ótedi. Bul iri jol elimizdiń tranzıttik múmkindigin keńeıtip, sonymen qatar kórshi eldermen qarym-qatynasymyz ben áriptestigimizdi nyǵaıta túsedi. Alaıda avtokólik joldarynyń ózekti máseleleri bar. Joldardyń qurylysy men kútimine bıýdjetten jyl saıyn qyrýar qarjy bólinedi. Respýblıkalyq agenttiktiń tóraǵasy Alık Shpekbaevtyń aıtýynsha, joldaǵy basty ózekti másele tek ǵana – sybaılas jemqorlyq.
«Aýdan, oblys ortalyqtaryn, selolyq okrýgterdi aýdan ortalyqtarymen qosatyn joldar qarnyńdy ashyrady.О́kinishke qaraı, osy joldardyń jaǵdaıy jaqsarmaı-aq qoıdy. Onyń birneshe sebebi bar. Aýa raıynyń ystyqty-sýyqtyǵy jergilikti jerdegi joldardyń buzylýyna ákeledi. Al basty sebep, onyń qurylysyna sybaılas jemqorlyqtyń aralasýynan jol sapasynyń tómendeýi der edim» dedi Alık Shpekbaev.
Al Qostanaı oblysy joldardyń uzyndyǵy boıynsha elimizde Shyǵys Qazaqstan oblysynan keıingi ekinshi oryndy alady. Oblys óńirindegi respýblıkalyq mańyzy bar joldardyń uzyndyǵy 1410 shaqyrymdy quraıdy. Jalpy, Qostanaı oblysynda barlyǵy 9300 shaqyrym jol bolsa, sonyń 80 prosenti jergilikti mańyzǵa ıe. Bıyl jyl basynan beri joldardyń jóndeý jumystaryna 36 mıllıard teńgeden asa qarjy jumsaldy. Sonyń arqasynda 18,5 shaqyrym jol qaıta jóndeldi, 26,5 shaqyrym jol kúrdeli jóndeýden ótti, 440 shaqyrym jolǵa orta deńgeıli jóndeý jumysy júrdi. Degenmen, jol qurylysynda oryn alatyn sybaılas jemqorlyqtyń kórinisi bul saladaǵy jumystyń berekesin qashyryp, sapany tómendetetinin oblys ákimi Arhımed Begejanov ta aıttyp ótti.
– Jol qurylysy salasy qarjy kólemi jóninen sharýashylyq salalary arasynda lıder bolyp tabylady. Qarjy bolǵan jerde ondaǵy jobalardy júzege asyrýǵa ınvestorlar da, merdiger kásiporyndar da múddelilik bildiredi. О́kinishke qaraı, qarjy mol bólinetin bul salada sybaılas jemqorlyq ta qatar júredi. 2016 jyly Jolaýshylar kóligi jáne avtomobıl joldary basqarmasy bastyǵynyń orynbasary jáne osy basqarmadaǵy tehnıkalyq baqylaý bóliminiń basshysy para alyp, ustaldy. Osyndaı jaǵdaılarǵa baılanysty biz birqatar sharalar belgiledik. Mysaly, biz basqarma qyzmetkerleri men merdiger uıymdar ókilderiniń tikeleı baılanysýyn múmkindiginshe azaıttyq. Joldyń qurylysy sapaly júrý úshin biz bes deńgeıli baqylaý jumysyn engizdik, – dedi Arhımed Begejanuly. Sonymen qatar óńir basshysy memlekettik organdar men úkimettik emes uıymdar tize qosyp, sybaılas jemqorlyqqa jol bermeý kerektigin aıtty.
Konferensııa barysynda «QazAvtoJol» Ulttyq kompanııasy» AQ men «Atameken» ulttyq kásipkerler palatasy Jol kartasyna qol qoıdy. Munan keıin konferensııaǵa qatysýshylar úsh jınaqty seksııalarǵa bólinip, avtomobıl joldary salasyndaǵy sybaılas jemqorlyqtyń aldyn alý máselelerin taldady. Onda sybaılas jemqorlyqqa qarsy kúreste memlekettik qurylymdar men memlekettik syńaıly sektorlar arasyndaǵy yntymaqtastyq, oǵan azamattyq qoǵam ınstıtýttarynyń, kásipkerlik qaýymdastyq pen odaqtardyń, úkimettik emes uıymdardyń tize qosýy áńgime boldy. Paneldik seksııalarda merdiger uıymdardyń jaýapkershiligin artyrýǵa kóńil bólindi.
Konferensııa aıasynda Qostanaı qalasynda elimizdegi altynshy «Qostanai –Adaldýq alaný» jobalyq keńsesi ashyldy.
Názıra Járimbet,
«Egemen Qazaqstan»
Qostanaı
