Tórt toptan turatyn balabaqsha 1 men 6 jas aralyǵyndaǵy balǵyndardy qabyldaıdy. Qurylysy 2017 jyly tamyzda bastalǵan ǵımaratqa 55 mıllıon teńge kóleminde qarjy jumsalypty. Glýbokoe aýdanynyń ákimi Qalıqan Baıǵonysov bul tárbıe oshaǵy osy aýylda 25 jyldan beri salynyp otyrǵan alǵashqy balabaqsha ekendigin aıtady. «Aýylda buryn balabaqsha retinde jumys istegen ǵımarat bos tur. Aýdannyń aqsaqaldaryn da, bedeldi adamdaryn da ıesine birneshe márte jiberdik. Alaıda nysandy el ıgiligine berýden bas tartty. Sóıtip ne isterimizdi bilmeı, daǵdaryp, tyǵyryqqa tirelgende Toqtarovtar otbasy, ıaǵnı Aıdyn men jubaıy Merýert qasymyzdan tabylyp, saýapty isti qolǵa alyp, jańadan balabaqsha turǵyzdy. Aýyl turǵyndary atynan alǵys aıtamyz», - degen aýdan ákimi balabaqsha ujymyna aýdandy damytý qory atynan túrli-tústi teledıdar tartý etti.
Igi sharaǵa qatysqan Shyǵys Qazaqstan aýyl sharýashylyǵy ǵylymı-zertteý ınstıtýty bas dırektorynyń orynbasary Nurlan Toqtarov: «Bıznestiń túri kóp qoı. Balabaqsha ashý bıznesi – saýapty bıznes. Qaıtarymy búgin bolmasa da, kóp jyldan keıin eldiń alǵysymen, balǵyndardyń lebizimen qaıtady», - deı kele búldirshinderge túrli-tústi teledıdar syılady.
Aýdan ákiminiń orynbasary Radjan Seıitqanovtyń aıtýynsha, aýdandaǵy 3 pen 6 jas aralyǵyndaǵy búldirshinder balabaqshamen 100 prosent qamtylǵan. Búginde Aqtasta 9 balabaqsha jumys isteıdi (tórteýi – memlekettik, beseýi – jeke menshik). Sońǵy úsh jylda aýdanda 5 balabaqsha ashylsa, sonyń tórteýin Toqtarovtar otbasy salyp beripti. «Bul ispen shuǵyldaný úsh uıyqtasaq túsimizge kirmegen edi. Men oblystyq salyq departamentinde jumys istedim. Joldasym Armatýra zaýytynda eńbek etti. Biz eń áýeli О́skemendegi Jibek matalar yqsham aýdanynda kottedj saldyq. Ony qalaı paıdalanarymyzdy bilmeı júrgende oblystyq bilim basqarmasyndaǵy apaıym balabaqsha ashý jóninde ıdeıa aıtty. Sodan ne kerek, nesıe alyp, 2014 jyly osy yqshamaýdanda alǵashqy balabaqshamyzdy ashtyq. Jalpy, biz О́skemende kottedjde balabaqsha ashý tájirıbesin engizgen alǵashqy kásipker shyǵarmyz. Bir jyldan keıin qala ákiminiń ótinishimen О́skemende taǵy bir balabaqsha ashtyq. Odan soń Glýbokoe aýdanynda tuńǵysh balabaqshamyz jumysyn bastady. Jyl saıyn ashyp jatyrmyz. Qazir bizdiń 8 balabaqshamyz bar. Onyń 4-ýi qalada, 4-ýi Glýbokoe aýdanynda», - deıdi Aıdyn Toqtarovtyń jubaıy Merýert.
Tuńǵysh Prezıdent kúnine arnalǵan merekelik sharalar budan ári Ývarov aýylyndaǵy Mádenıet úıinde jalǵasyp, aýdan ákimi Qalıhan Baıǵonysov Glýbokoenyń damýyna eńbek sińirip júrgen birqatar azamattarǵa Alǵys hattar men «Astananyń 20 jyldyǵy» medalin tabys etti.
Azamat QASYM,
Shyǵys Qazaqstan oblysy,
Glýbokoe aýdany
