Ǵylymı tájirıbeler alańyna basqosýǵa otandyq jas ǵalymdar, sheteldik sarapshylar qatysty, olardyń qatarynda AQSh-tyń Perdıý, Nıgerııanyń Nıl ýnıversıtetinen kelgen jáne de Nazarbaev ýnıversıtetiniń professorlary ǵylymı eńbekterimen bólisti.
Sheteldik qonaqtarǵa qazaqtyń qonaqjaılyq dástúrimen erekshe syı-qurmet jasaldy. SDÝ rektory Qanat Qojahmet pen Injenerlik jáne jaratylystaný fakýltetiniń dekany Meırambek Japarov búgingi tájirıbe alańynyń mańyzdylyǵyn atap ótti. Ǵalymdar zamanýı trendtegi IT salasynyń jan-jaqty baǵyttary boıynsha kásibı taqyryptardy keńinen talqylady. Jobaǵa 35 ǵylymı jumys qabyldansa, olardyń 25-i otandyq avtorlardan, 10-y SDÝ ýnıversıtetiniń jas ǵalymdarynyń zertteýleri bolyp tabylady. Taratylǵan ıntellektýaldy júıeler, medısınalyq ınformatıka, jasandy ıntellekt, ǵylymı esepteýler, sandyq sıgnaldardy óńdeý, ınjenerlik modeldeý jáne baqylaý, baǵdarlamalyq qamtamasyz etýdi jobalaý, esepteý (esepteý ǵylymdary), kompıýterlik kórý, qyzyqty qosymshalar jáne baǵdarlamalaý tilderi syndy túrli ózekti taqyryptardy qamtyǵan ǵylymı jumystar qatysýshylar tarapynan joǵary baǵasyn alyp, zor qyzyǵýshylyq týǵyzdy.
AQSh-tyń Perdıý ýnıversıtetinen kelgen professor Erık Metson ǵylymı eńbeginde zamanýı tehnologııalar múmkindigimen drondar arqyly lańkestik aktileriniń jasalý qaýpi, onymen kúresý joldaryn túsindirdi.
Konferensııaǵńa kelgenine jyly lebizin bildirgen sarapshy Erık Metson jas ǵalymdardyń ǵylymı turǵyda jańa tehnologııalarmen baılanysty múmkindikterimen qatar qoǵamda bolyp jatqan túrli máselelerdi kóterýine óz baǵasyn berip, ǵylymı jumystardyń mazmuny men maǵynasy óte sapaly degen pikirin bildirdi.
Jas ǵalymdar men doktoranttar elektrondy kompıýter jáne esepteý tehnıkalarynyń barlyq aspektilerinen oqý-ádistemelik jumystaryn, júz taný ǵylymy boıynsha kúrdeli algorıtm, mıkrooqýlyqtardy ázirleý jáne tájirıbe júzinde paıdalaný sııaqty túrli zertteýlerin jıynǵa qatysýshy ǵalymdar qaýymdastyǵynyń nazaryna usyndy.
SDÝ aǵa oqytýshysy Djemıl Turan «Konferensııada talqylanyp jatqan túrli taqyryptar eń aldymen ǵalymdarǵa zor tájirıbe almasý múmkindigin ári zertteý salasyna tyń serpilis beredi» degen pikirin bildirdi.
Elvıra Serikqyzy,
«Egemen Qazaqstan»
ALMATY
