Elbasy is-shara bastalmas buryn áskerı-patrıottyq ortalyq mýzeıiniń ekspozısııalarymen tanysty. Onda Qazaqstan armııasyna arnalǵan áskerı sýretshiler stýdııasynyń týyndylary men «Orbulaq shaıqasynyń» dıoramasy qoıylǵan. Sonymen qatar Elbasy 3D-mapping shoý tehnologııasy boıynsha uıymdastyrylǵan kórmeni tamashalady.
Qazaqstan Prezıdenti aldymen sharaǵa qatysýshylardy óskeleń urpaqty otanshyldyqqa tárbıeleıtin «Jas sarbaz» qozǵalysynyń qurylýymen quttyqtady. Memleket basshysy ulttyq rýhty qalyptastyryp, el tarıhyn tereń zertteýdiń mańyzdylyǵyn aıryqsha atap ótti.
– Jaqynda jarııalanǵan Joldaýdaǵy mańyzdy máselelerdiń biri – patrıottyq tárbıe berý isi. Eger biz Otanymyzdy qorǵaı almasaq, onda táýelsizdiktiń 27 jyly ishinde atqarǵan barlyq jumysymyzdyń máni joǵalady, – dedi Nursultan Nazarbaev.
Elbasy búginde memleket tarapynan atqarylyp jatqan sharalardyń bári keler urpaq úshin jaqsy jaǵdaı jasaýǵa baǵyttalǵanyn aıtty.
– Osynyń bári jastarymyz – bizdiń bolashaǵymyz úshin. Atqarylyp jatqan jumystar sizderdiń ómirlerińizdi odan saıyn jaqsartyp, Qazaqstanymyzdy odan ári baıyta túsý úshin jasalýda, – dedi Memleket basshysy. Nursultan Nazarbaev elimizdegi jas býyndy «Jas sarbaz» qozǵalysy múshesiniń qataryna qosylýǵa shaqyrdy.
– «Jas sarbaz» qozǵalysy elimizdiń barlyq óńirinde qurylýy tıis. Elimizdegi jastar osy qozǵalystyń qatarynan tabylýy qajet. Sondyqtan dene shynyqtyrýmen aınalysyp, áskerı mamandyqtardy ıgergen jón. Bul qozǵalys Qorǵanys mınıstrligimen birlesip, patrıottar tárbıeleý isine belsendi atsalysýy kerek. Sonda ǵana sizder óz halqyńyzdyń tiregine aınalasyzdar, – dedi Qazaqstan Prezıdenti. Memleket basshysy «Uly dalanyń jeti qyry» atty maqalanyń qazaqstandyq patrıotızmdi kúsheıtý isindegi erekshe mańyzy baryn atap ótti. Sonymen qatar Qazaqstan qoǵamynyń gúldenýi úshin turaqtylyq pen ultaralyq kelisimdi saqtaýdyń mańyzdylyǵyna toqtaldy.
– Elimizde kóptegen etnos ókilderi turady. Biz bárimiz de – Qazaqstan azamattarymyz. Baı tarıhymyzdyń arqasynda tózimdilik pen qurmetteýdi boıymyzǵa sińirdik. Bul qundylyqtar Qazaqstandy biriktiredi, memleketti qýatty jáne syıly memleketke aınaldyrady. Sondyqtan Otanymyzdyń patrıoty bolý – barshamyzdyń paryzymyz, – dedi Elbasy. Sóz sońynda Memleket basshysy barlyq qatysýshylarǵa tabys pen jańa jetistikter tiledi.
Kezdesý barysynda jas sarbazdar Memleket basshysyna «Jas sarbazdyń» qurmetti tóraǵasy» kýáligin, tósbelgisi men arnaıy kıimin tabystady.
Osydan úsh jyl buryn dál osy kúni Memleket basshysy – Qazaqstan Respýblıkasy Qarýly kúshteriniń mádenı oshaǵy − Ulttyq áskerı-patrıottyq ortalyqty saltanatty túrde ashqan bolatyn. Saltanatty jıynda «Jas sarbaz» balalar men jasóspirimder áskerı-patrıottyq qozǵalysy» respýblıkalyq qoǵamdyq birlestiginiń jumysy baıandalyp, qozǵalystyń óńirlerdegi fılıaldary óz jumysyn bastady. Sonymen qatar qozǵalys tárbıelenýshileriniń jańa kıim úlgisi tanystyryldy.
Búginde «Jas sarbaz» balalar men jasóspirimder áskerı-patrıottyq qozǵalysy» respýblıkalyq qoǵamdyq birlestiginde 2828-ge jýyq áskerı-patrıottyq klýb pen synyptar bar. Onda 73 164 bala qamtylǵan. Atalǵan ortalyqta sońǵy eki jyl ishinde áskerı-patrıottyq tárbıeleý boıynsha 992 is-shara ótkizilgen. Onyń ishinde jyl saıyn «Aıbyn» respýblıkalyq áskerı-patrıottyq jastar jıyny da bar. Byltyrdan bastap atalǵan shara halyqaralyq dárejede uıymdastyrylyp keledi.
Saltanatty sharada sóz alǵan aǵa leıtenant Meıirbek Meńdiǵalıev: Memleket basshysynyń tapsyrmasy boıynsha balalar men jasóspirimder áskerı-patrıottyq qozǵalysy» qoǵamdyq birlestigi quryldy. Aldaǵy ýaqytta respýblıka boıynsha «Jas sarbazdyń» jańa synyptary men áskerı-patrıottyq klýbtary ashylady. Bizdiń maqsatymyz – tól tarıhyn biletin, búginin baǵalaıtyn, táýelsizdigimizdi kóziniń qarashyǵyndaı saqtaıtyn ulaǵatty jas órendi tárbıeleý», dedi. Al Astana qalasyndaǵy 66-shy mektep-lıseıiniń 11-synyp oqýshysy Danııar Beketov zamandastarynyń tek bilim, ǵylym, ınnovasııa salalaryn meńgerip qana qoımaı, óz ultynyń mádenıeti men tól tarıhyn bilýge umtylatynyn jetkizdi. «О́z Otanymyzdy qorǵaıtyn jigerli, bilimdi sarbaz bolýdy maqsat etemiz. Qatarlastarymyzdy sportpen shuǵyldanýǵa, ulttyq tanym kókjıegin keńeıtýge shaqyramyz», dedi ol.
Qazaqstan Respýblıkasy Tuńǵysh Prezıdenti kúni qarsańynda uıymdastyrylǵan kezdesýde jas sarbazdar shaǵyn konsert uıymdastyryp, jetken jetistikterimen bólisti.
Erkejan AITQAZY,
«Egemen Qazaqstan»
