Zaýyttaǵy áriptesteri onyń eńbekqorlyǵyna tańdanady. «Men Petr Pavlovıchti tuńǵysh ret kórgende 37 jastaǵy qylshyldaǵan jigit edi. Zaýytta ýaqytsha daǵdarys bolǵan jyldary basqa mekemede jumys isteýge týra keldi. Mine, 10 jyldan astam ýaqyttan beri úırenshikti mekenine oralyp, jastardan qalyspaı eńbek etýde. Osy jyldar ishinde qarııanyń bireýge daýys kótergenin estimeppin. Qol qýsyryp otyrǵan kezin de kórmeppin. Qashan kórseń, stanok basynan shyqpaıdy. Eńbekqorlyǵyn kórmeısiz be, Kondensator zaýytynan osynda aýysqannan keıin ózi jumys isteıtin úlken stanoktyń janyna «jumys arasynda bosqa otyrmaıyn, ishim pyspasyn» dep taǵy da bir shaǵyn stanok qoıyp aldy», - deıdi «Gıdrostal» JShS dırektory Anatolıı Sınısyn.
Rasynda, Petr Shınkarevti toqsanǵa qıǵyńyz kelmeıtindeı. Júrisi shıraq. Ázilin de tastamaıdy. Áli kúnge deıin kólikti ózi júrgizedi. «Kóp nárse adamnyń minezine baılanysty. Men ózim eshkimnen eshteńeni jasyrmaı el aldynda, ashyq júrgendi jaqsy kóremin. Úıimdi de eldiń kóz aldynda saldym. Jurtty kórip júreıin, jurt meni kórsin dep. Árıne, 90 jasqa kelip, stanok basynda turǵanym zaýyttaǵy keıbir adamdarǵa unamaıtyn da shyǵar. Bálkim, jastardyń kózine súıel bop ta kórinetin shyǵarmyn» deıdi sózin ázilge súıegen qarııa.
Toqsan jasqa kelse de, toptan qalmaı, temir jonyp júrgen Petr Shınkarev týraly bekerge aıtyp otyrǵan joqpyz. Tuńǵysh Prezıdent kúni qarsańynda Qazaqstan mashına jasaýshylar odaǵynyń dırektory Rıshat Asanseıitov Astanadan arnaıy kelip, eńbekqor qartqa «Qurmetti mashına jasaýshy» tósbelgisin áriptesteri aldynda saltanatty túrde tapsyryp, alǵysyn aıtty. «Biz negizi óz salamyzdaǵy úzdik qyzmetkerlerdi, eńbegi sińgen ardagerlerdi jyl saıyn qyrkúıektiń sońǵy jeksenbisinde, Mashına jasaýshylar kúninde marapattaımyz. О́skemende 90 jastaǵy osyndaı kisiniń bar ekenin, áli de stanok basynda turǵanyn bilgende mekeme basshylyǵyna Investısııalar jáne damý mınıstrligine usynys hat jazýyn ótindik. Mınıstrlik usynysymyzdy qoldady. Árıne, 90 jasta stanokta turý ońaı sharýa emes. Bul - jastarǵa úlgi bolarlyq dúnıe dep oılaımyz. Jasyratyny joq, kóbimiz stanokta turmaq túgili, osy jasqa jetsek dep armandaımyz», - dedi ol.
Azamat QASYM,
«Egemen Qazaqstan»
О́SKEMEN
