Analar keńesi men «Ájeler mektebiniń» músheleri merekelik sharany «Elbasynyń anasy úlgi bolar barshaǵa» degen taqyrypqa arnady. Keńestiń tóraıymy, ulaǵatty ustaz Kúlimkóz Smaılova Prezıdent N.Nazarbaevtyń «Qoǵamnyń damý barysyn ómirde – názik, kóńilde – bıik, al iste myǵym áıelder qaýymynsyz kózge elestetý múmkin emes», degen sózin alǵa tarta otyryp, boıynda qazaq áıeline tán ımandylyq, salmaqtylyq, bııazylyq, izettilik qasıetter otbasy berekesin saqtaýdyń, deni saý, elin, jerin, Otanyn qorǵaýǵa ár kez daıyn urpaq ósirýge qyzmet etip kele jatqanyn áńgimeledi.
Búgingi kesh Elbasynyń anasy Áljan apanyń bar bolmysyn úlgi ete otyryp, uldaryn Nursultan Ábishulyndaı el qamyn jeıtin, týǵan jerin qasterleıtin, birneshe tildi meńgergen, meıirimdi, patrıot etip ósirý maqsatyn kózdeıdi. Úlkendermen qosa jas órenderdi shaqyryp otyrǵanymyz sondyqtan», dedi Kúlimkóz Qaıyrbaıqyzy.
«Tuńǵysh Prezıdent – naǵyz patrıotızmniń úlgisi», «Ul tárbıesindegi tektaný, shejireniń róli», «Qazaq otbasyndaǵy ul balanyń tárbıesi» degen taqyryptar otbasynyń uıytqysy, meıirim-shapaǵat kózi Áljan anamyzdyń ul-qyzdaryn ata-baba dástúrimen tektilikke tárbıeleý jolyndaǵy janqııarlyq eńbegi, qamqory, súıispenshiligi, adamdy qas-qabaǵynan, janarynan tanıtyn baıqaǵysh qasıetteri jaıly keleli áńgimeler qozǵaldy. Súıikti áje Valentına Volochkeevıch Qazaqstanda turatynyn maqtan tutatynyn, qazaq halqyna dán rıza ekenin, nemeresi Iаroslavty skrıpka ónerine baýlyp júrgenin erekshe rızashylyq sezimmen jetkizdi.
Maqpal Sárkenqyzynyń Áljan ana týraly baıandamasyn jınalǵandar uıyp tyńdady. Áljan ananyń syrtqy qarapaıym beınesi qanshama keremet qasıetterdi jasyryp turǵanyna, topyraqty ólim, toı jumystaryn uıymdastyrý qabileti erekshe ekenine, ásirese qyzyn uzatatyndar Áljandy mańaılaıtynyna kóptegen mysal keltirdi. Kórshileri men qurbylaryn jaýyp jiberip, bir aptanyń ishinde qyz jasaýyn samsatyp qoıady eken. О́zi termelep turyp tekemet toqıdy, kıiz basady. Terim alashaǵa da epti, bir sháýgim shaı qaınatyp jiberip, qatarlastarynyń basyn qosa qoıady. «Anaý bir qyzymyz uzatylady, qoldan kelgenshe qarmanaıyq, bárin bilgende oıýdy úırenbeppin, qıyqsha-quraǵyńyzǵa bapandaı bolsaq ta», dep otyrady eken. Káde úlestirý men syı taratýdy da qapysyz meńgergen meıirimdi jandy jurtshylyq jeńeshe atap ketken. Til úıiretin aırany men qoıý kilegeıi, qaımaq qatqan kúreń shaıy da kesesine qol sozǵandardyń esinde qalypty. Áljan aqyn ǵana emes, aýyl ajaryn keltirer ánshi de edi. El ishine keń taraǵan ánderdi naqyshyna keltirip oryndaıtyn bolǵan.
Qalalyq ardagerler keńesiniń tóraıymy Sara Tasemenova er balanyń bir sózdi, er minezdi, eńbekqor, kópshil bolyp ósýindegi ot basy, oshaq qasy qamqorshysy, jylytýshysy ananyń róline, tálim-tárbıesine ekpin túsirip, oǵan Táýelsiz Qazaqstannyń Tuńǵysh Prezıdentiniń ómiri aıqyn mysal ekenin aıtty. Sapýra qajy Táshenova kelinderdi, jas otaý ıelerin izettilikke, yntymaqqa úndedi. Psıholog Irına Iаkımova Nursultan Ábishulyndaı ataqty tulǵanyń týǵan jerin, ósip-óngen ortasyn, bylaısha aıtqanda geneologııalyq túp-tamyryn, dińgegin bilý jas býyn úshin erekshe taǵylym ekenin aıta kelip, Áljandaı áz analardy «jumaq ananyń aıaǵynyń astynda» degen qanatty sózben salystyrdy.
Jıynǵa 1 jeltoqsanda dúnıege kelgen 14 er bala analarymen birge jıynǵa arnaıy shaqyrylyp, qaısar azamat bolyp óssin degen yrymmen árqaısysynyń qolyna qamshy ustatty. Kóp bala ósirgen bir top anaǵa syı-sııapat jasaldy.
О́mir ESQALI,
«Egemen Qazaqstan»
Soltústik Qazaqstan oblysy
