«Jaqynda maýsym bitti, fınalǵa shyqqandar anyqtaldy. Al oblys ákiminiń kýbogi jyl boıy júrgen «Jaıdarman» oıyndaryndaǵy talanttylardy, úzdikterdi kórsetetin jármeńke, esep-berý konserti sekildi. Elimizde KTK oıyndarynyń sapasy artyp, damyp keledi. Jaıdarmanshylar sahnaǵa ázilmen alyp shyqqan máseleler qoǵamda pikir qalyptastyrady dep oılaımyn» deıdi respýblıkalyq telejobalardyń avtory, redaktor Qasıet Kárim.
Qostanaıda ótken oıynda jaıdarmanshylar jurttyń kókeıindegini ázilmen jetkizip, kúlkige qaryq etti. Oıyn qorytyndysynda ádilqazylar alqasy M.Dýlatov atyndaǵy Qostanaı ınjenerlik-ekonomıkalyq ýnıversıtetiniń «Jańa ǵasyr» komandasyn úzdik dep taýyp, olarǵa birinshi oryn úshin 300 myń teńgeniń sertıfıkatyn tabys etti. Ekinshi oryndy 200 myń teńge júldesimen «Boranqul» komandasy aldy. Úshinshi oryn Petropavldan kelgen «5 jańalyq» komandasyna berildi, júldesine 100 myń teńge tabys etildi. Oıynda Astanadan kelgen «Evrazıat» komandasynyń múshesi Aıbar Seıdaǵalı «eń úzdik oıynshy» atanyp, 50 myń teńge syılyǵyn aldy.
Bir aıta keterligi, sońǵy jyldary Qostanaı oblysynyń komandalary respýblıkalyq lıgalarda, televızııalyq oıyndarda óńir namysyn qorǵap júr.
«Bıylǵy Qostanaı ashyq lıgasynyń chempıony «Daryn», jergilikti «Qurdastar» erkin quramasy», Sokolov-Sarybaı ken óndirý birlestiginiń quramasy, Arqalyq pedagogıka ınstıtýtynyń «Arý.kz» komandalary respýblıkalyq lıgalarǵa qatysyp júr. Olardyń qatarynda stýdentter de, jumysshylar da, ár túrli mamandyqtardyń ókilderi bar. Olar shyǵarmashylyǵyn damytyp keledi» deıdi «Jaıdarly jastar» qoǵamdyq qorynyń dırektory Marǵulan Bákir. Sonymen qatar «Jaıdarman» respýblıkalyq oıyndarynyń redaktory Qasıet Kárim de qostanaılyq komandalardyń ónerine jyly lebiz bildirdi.
«Qostanaıda buryn televızııalyq lıgada oınaǵan komandalar bola qoıǵan joq edi. 2012 jyldan bastap olar lıgalarda kórine bastady. Búginde televızııalyq lıgalarda kórermender Qostanaıdan, Arqalyqtan, Torǵaıdan qatysatyn komandalardy bilip qaldy. Jalpy Qazaqstannyń soltústik óńirlerinde oıynshylardyń jańa tolqyny ósip keledi. Solardan úmit kútemiz. Olardyń barlyǵy mektep qabyrǵasynda júrip oıynǵa qatysa bastaǵan, jaqsy oqyǵan balalar. Qazir olardan quralǵan komandalar sheberligi respýblıkalyq deńgeıge jetip qaldy. Tek Qostanaıda ǵana emes, jalpy Qazaqstannyń soltústik óńirinde jaıdarman oıynshylarynyń jaqsy mektebi qalyptasyp keledi. Biz soǵan qýanamyz» dedi Qasıet Kárim.
Názıra JÁRIMBET,
«Egemen Qazaqstan»
Qostanaı
