IT-tehnologııalarmen jabdyqtalǵan jańa nysan paıdalanýǵa berilgeli robototehnıka, bıotehnologııa, mehatronıka, 3D prototıpteýdiń, taǵy basqa zamanaýı salalardyń ortalyǵyna aınalyp úlgirdi. Munda qosymsha bilim berýdiń sońǵy úlgidegi ǵylymı jetistikteri de toptastyrylǵan. 1800 oqýshy bir mezette 80-ge jýyq úıirmelerge qatysa alady. Qazaqstan men Reseı arasyndaǵy HY óńiraralyq yntymaqtastyq forýmy osynda uıymdastyrylyp, alǵashqy synaq «jaqsy» degen baǵaǵa ıe boldy.
Robo-festıvalǵa elimizdiń barlyq aımaqtarynan, sondaı-aq Qyrǵyzstannan, О́zbekstannan jáne Reseıden 10-21 jas aralyǵyndaǵy 250-ge jýyq jas robot jasaýshylar jınalyp, ózara bilim synasty.
Sharanyń ashylý saltanatynda sóılegen sózinde aımaq basshysy Qumar Aqsaqalov Elbasy jas býyn aldyna ozyq úlgidegi tehnologııalardy keńinen meńgerý mindetin qoıǵanyn, keleshektegi damý jolymyzdy tabıǵı resýrstar emes, zamanǵa saı kemel bilim aıqyndaıtynyn aıta kelip, festıvalǵa qatysýshylarǵa tabys tiledi. «Robotıks» federasııasynyń prezıdenti Aıjan Jákeeva shara maqsaty Qazaqstanda sporttyq robototehnıkaǵa degen qyzyǵýshylyqty arttyrý bolyp tabylatynyn, robototehnıka bilim berý júıesine jeke pán retinde engizilgenin jetkizdi.
Balalar jasaǵan robottar úlken jáne kishi bıatlon, shaǵyn robo sýmo, jyljymaly robo sýmo, labırınt, bıatlon, estafeta túrleri boıynsha saıysqa túsip, kóp upaı jınaýǵa umtyldy. Qyrǵyzstannan kelgen ókil Ilıa Fomın ákelgen robot mashına lego-labırınt oıynynda táp-táýir óner kórsetti. Túrkistandyq Almas Aýdabekovtyń de robot qurastyrýda tájirıbesi qalyptasyp qalǵany ańǵarylady. Reseıdiń Chelıabi qalasynan kelgen Mıhaıl Ivanov estafetada, al batysqazaqstandyq Nurǵalı Hatep birneshe túri boıynsha baq synaýdy jón kóripti.
Byltyr Aqtóbede ótken chempıonatta qaraǵandylyq jas órender des bermese bul joly da eń myqty ekenin tanytyp, oblys ákimi tikken bas júldeni jeńip aldy. Ekinshi, úshinshi oryndardy Atyraý men Batys Qazaqstan obystarynyń ókilderi bólisti. Jekelegen atalymdar boıynsha da úzdikter anyqtalyp, syı-sııapattar kórsetildi.
Federasııanyń pılottyq baǵdarlamalary aıasynda tehnıkalyq shyǵarmashylyq arqyly balalardy beıimdeý jáne áleýmettik ońaltý, mektepke deıingi robotehnıka tájirıbeleri úlgi etildi. Sheberlik synyptary ótkizildi.
О́mir ESQALI,
«Egemen Qazaqstan»
Soltústik Qazaqstan oblysy
