Jyl basynan beri jańasha bilim berýge kirisken Almatylyq muǵalimderdiń 70%-niń jalaqysy 30 prosentke kóbeıgen. Al qyrkúıekten bastap ulttyq kásibı testileýdi ońaı eńsergen 1293 ustaz alǵash ret ózderiniń qyzmettik eńbekaqysyna 30 dan 50 prosentke deıin qosymsha aqy alatyn bolady. Bul týraly qalanyń pedagogtar qaýymymen kezdesken shahar basshysy Baýyrjan Baıbek aıtty. Ásirese fızıka, hımııa, ınformatıka pánderin aǵylshyn tilinde oqytatyn mamandarǵa aıryqsha jaǵdaı jasaý kózdelgen. Mundaı muǵalimderdiń qyzmettik jalaqylaryna qosa 200%-tik kólemde qosymsha aqy tólenedi.
Qalanyń úzdik pedagogtarymen kezdesken ákim Memleket basshysynyń Joldaýyn júzege asyrý aıasynda bilim jáne ǵylym mınıstrliginiń «Pedagogtyń mártebesi týraly» jáne «Oqýshy men muǵalimniń júktemesin azaıtý boıynsha birqatar zań aktilerine ózgerister men qosymshalar engizý týraly» zańdardyń jobalaryn daıyndaǵanyn atap ótti. Onyń sózinshe, qaladaǵy barlyq ustazdar men ata-analar qaýymdastyǵynyń ókilderi atalǵan zańdy talqylaýǵa belsendi túrde qatysýy kerek.
«Eń mańyzdysy, Jobadan qazaqstandyq pedagogtar óz jumystarynyń joǵary baǵaǵa ıe ekenin, bilim salasynda týyndaǵan barlyq máselelerge, oqýshylar men muǵalimderge aıryqsha nazar aýdarylatynyn kórdi. Sizderdiń qalanyń bilim salasyn damytýǵa qosqan úlesterińiz óte joǵary, jaýapty ári qıyndyǵy mol ustazdyq qyzmetterińizge alǵys aıtamyn. Oqýshylardyń túrli bilim saıystarynda bıik jetistikterge jetýi jeke kásibı biliktilikterińizdiń sapasyn aıqyndaı túsedi», dedi ol.
Almaty qalasynyń bilim berý júıesinde 1078 bilim berý uıymy jumys istese sonyń jeti júzden astamy mektepke deıingi bilim berý mekemesi. Máselen, sońǵy eki jyldyń ózinde qalada 10,4 myń adamǵa arnalǵan 262 mektepke deıingi mekeme ashylǵan. Búginde mektepke deıingi bilim berý jáne tárbıeleý isimen qaladaǵy úsh jastan alty jasqa deıingi jetkinshekterdiń 81,2 prosenti qamtylyp otyr. Mektepter men mektepten tys uıymdarda iske qosylǵan robototehnıka jáne 3D modeldeý úıirmelerinde 3 myńnan astam shákirt bilim alady.
Arman OKTIаBR,
«Egemen Qazaqstan»
ALMATY
