Elbasynyń baǵdarlamalyq maqalasy qoǵamnyń, ǵylymı ortanyń, shyǵarmashylyq zııaly qaýymnyń keń aýqymdy talqylaýyna ıe boldy. Jalpy, adamzattyq jáne ulttyq tarıhqa jańasha tujyrymdamalyq kózqaras Qazaqstannyń tarıhyn jáne tarıhı eskertkishterin saqtaý men dáripteýge baǵyttalǵan joldy jalǵastyrady.
Alqaly basqosýdy Qazaqstan strategııalyq zertteýler ınstıtýty dırektorynyń orynbasary Sanat Kóshkimbaev ashty. – Prezıdent óz maqalasynda tarıhı belsendilikti erekshe atap ótken. Kez kelgen kezeńniń artynda jarqyn bolashaqqa bet alǵan ult múddesi turady. Mine, sondyqtan da Prezıdentimiz tarıhı múddeni damytý arqyly ulttyq sanany jańǵyrtýdy kózdeıdi. Iаǵnı biz ótkenimiz ben bolashaǵymyzdy baılanystyra otyryp, osyndaı Uly dalanyń urpaqtary ekenimizdi maqtan tutýymyz kerek. Biz tarıhqa qarap, odan jarqyn, shabyttandyratyn jáne oń mysaldar tabýymyz kerek, – dedi ol.
Sondaı-aq ál-Farabı atyndaǵy Qazaq Ulttyq ýnıversıtetiniń arheologııa jáne dala órkenıeti ǵylymı-zertteý ınstıtýtynyń dırektory Vıktor Zaıbert baıandama jasady. Onyń aıtýynsha, Memleket basshysy «Uly dalanyń jeti qyry» atty maqalasynda bir jaǵynan otandyq ǵylymnyń jetistigi men qoǵamnyń damýyn atap ótken bolsa, ekinshi jaǵynan elimizdiń bolashaǵyna fılosofııalyq kózqarastardyń keń arnasyn salyp berip otyr. «Jalpy, Elbasy aıtqan Uly dala júıesi álemge kóptegen jańalyqty berdi. Uly dala HVIII-HH ǵasyrlarda tarıhshylar jazǵandaı ótpeli dáliz ǵana emes, Eýrazııanyń búkil aýmaǵynda ıgi ınnovasııalar týdyrǵan órkenıet oshaǵy boldy. Ejelgi zertteýler kórsetkendeı, Uly dalada órkenıet pen úderistiń deńgeıi tek materıaldyq baza kózimen ǵana emes, eń aldymen rýhanı álem jáne áleýmettik-saıası baǵdarlarymen erekshelenedi. Tarıhı damýdyń bolashaǵynda onyń júrip ótken myńdaǵan tereń qabattary jatyr», deıdi tarıhshy V.Zaıbert.
Dóńgelek ústel barysynda Uly dalany júıeli qarastyrýǵa qajetti negizgi ımperatıvter, álemdik úderisterdegi Qazaqstannyń rólin qaıta qarastyrý sııaqty kúrdeli máseleler sóz bolyp, naqty jobalar men baǵdarlamalar talqylandy.
Mıras ASAN,
«Egemen Qazaqstan»
