Fýtbol • 05 Jeltoqsan, 2018

«Qazaq Messıi» Qazaqstanǵa orala ma?

248 retkórsetildi

Sońǵy jyldary qazaq fýtbolynyń bolashaǵy dep úmit kúttiretin birneshe talantty jas fýtbolshylar shyǵa bastady. Olardyń birshamasy qazir túrli deńgeıdegi ulttyq qurama sapynda dop teýip júr. Solardyń biri jáne biregeıi Reseıdiń «Ýfa» klýbynda oınap júrgen tarazdyq aıaqdobshy Erkebulan Seıdahmet.

Jýyrda qazaqstandyq BAQ betterinde Seıdahmet jýyq arada «Qaırat» nemese «Astana» komandalaryna aýysady eken sybys lezde tarap, áleýmettik jelide biraz talqyǵa tústi. Biraq «Qaırat» ta, «Astana» komandasy da bul aqparatqa baılanysty eshqandaı málimdeme jasamady. Al Erkebulan Seıdahmet bolsa, otandyq baspasózge bergen suqbatynda «Baýyrjan Islamhanmen birge oınaǵym keledi, «Qaıratta» oınaý bala kezgi armanym» dep aıtqan edi.

Bul aqparattyń taraýyna Seıdahmetti «Ýfaǵa» shaqyrǵan sol ýaqyttaǵy klýbtyń bas bapkeri Sergeı Semaktyń «Zenıt» komandasyna aýysýy jáne fýtbolshynyń jaraqatynan soń alańǵa jıi shyqpaýyna baılanysty onyń agentiniń kezekti «aqparattyq» júrisi bolýy múmkin degen boljam bar.

Erkebulan qazaqstandyq komandanyń birine aýysýy múmkin degen aqparat tarmas buryn, «Ýfa» klýbynyń dırektory Shamıl Gazızov otandyq bir saıtqa bergen suhbatynda Erkebulan Seıdahmetke senetinin aıtqan. «Seıdahmet óte talantty oıynshy. Onyń potensıaly joǵary. «Ýfa» bul fýtbolshyǵa senim artady. Erkebulandy basqa klýbqa satady eken nemese jalǵa beredi degenniń bári jaı ǵana qaýeset. Fýtbolshy jaraqatynan endi aıyǵyp keledi. Tolyq jazylǵan soń, alańǵa shyǵady. Biz asyqpaımyz, ol qatarǵa jyldam arada qosylady dep senemiz», deıdi Shamıl Gazızov.

Al endi Shamıl Gazızov ne úshin Seıdahmetke senim artyp otyr, qazaq fýtbolshysy «Ýfaǵa» ne úshin qajet? degen suraqqa jaýap izdep kórsek. 2017 jyly Reseıde ótken «Granatkın» týrnırinen soń óziniń talatynymen jáne eńbekqorlyǵymen tanylǵan Seıdahmet birden «Zenıttiń» komandasynyń kózine tústi. Tipti, «Zenıttiń» jastar quramynda bir-eki ret jasyl alańǵa shyqqan-dy. Biraq jas mólsherine baılanysty sheteldik komandamen kelisim shartqa otyra almady. Araǵa bir jyl salyp, ıaǵnı Erkebulan 18 jasqa tolǵan soń «Ýfa» komandasy otandasymyzdy attaı qalap, Bashqurstan komandasynyń quramyna aldy. Sebebi, talantty jas fýtbolshy tárbıelep, eýropalyq TOP 5 birinshiliktiń bir komandasyna úlken somada satýdy kózdeıdi. Áli de sol maqsatta ustap otyrýy múmkin. О́ıtkeni, «Ýfa» osyǵan deıin ýkraınalyq jas talant Aleksandr Zınchenkony «Manchester Sıtıge» satqan bolatyn. Sondyqtan Bashqurstannyń bul komandasy kóptegen jas talanttar úshin Eýropaǵa bastaıtyn baspaldaq sekildi kórinedi.

18 jastaǵy fýtbolshy jyl basynda «Ýfa» sapyna aýysqanyn aıttyq qoı. Sol ýaqytta búkil Reseılik jáne Qazaqstandyq BAQ ókili ony bolashaq «Qazaq Messı» dep jarııaǵa jar salyp, bir-birimen jarysa jazyp jatty. Osylaısha, Erkebulannyń oıynynan buryn ataǵy TMD elderine tez tarady. Áleýmettik jelidegi paraqshalaryna jazylýshy jankúıerlerdiń sany saǵat saıyn arta bastady. Bylaısha aıtqanda, belgili bir deńgeıde tanylyp qaldy. Al oıyn jaǵynan ázirshe kózge túser emes.

Erkebulan Reseı premer-lıgasynyń bıylǵy maýsymynda bar-joǵy eki ret ǵana alańǵa shyqty. Sondaı-aq ol Reseı birinshiliginiń ótken maýsymynda jaraqatyn baılanysty eki ret alańǵa shyqqan edi. Jaraqatynan aıyǵyp, qatarǵa qosylǵan soń Seıdahmet birden «Ýfa» sapynda oınamaı, jastar quramymen bir oıyn ótkizdi. Ýfadaǵy «Neftıanık» stadıonynda «Ýfanyń» jastar quramasy Sankt-Peterbýrgtiń «Zenıt» klýbyndaǵy qurdastarymen kezdesti. Bul oıynda qonaqtar 5:0 esebimen jeńiske jetti. Erkebulan alańda sımýlıasııa jasap, sary qaǵaz aldy. Bir ret tepken doby qaqpanyń jaqtaýynan qaıtty. Bir-eki aıyp dobyn oryndady.

Al sonan soń negizgi klýbqa oralyp, premer-lıganyń 7-týrynda Máskeýdiń SSKA komandasyna qarsy ótken oıynda ekinshi taımda alańǵa shyǵyp, nebári 22 mınýt qana oınap, bir sary qaǵaz aldy. Ekinshi oıynyn kýbogtyq matchta «Nıjnıı Novgorod» klýbymen ótkizip, negizgi quramda 53 mınýt oınady. Erkebulannyń qazirshe Reseıdegi «jetistigi» osy.

О́tken aptada «Ýfa» komandasynyń basshylyǵy Sergeı Semaktyń ornyna bas jattyqtyrýshy bolyp taǵaıyndalǵan Sergeı Tomarovty qyzmetinen bosatty. Oǵan sebep komandanyń Reseı premer-lıgasynda 13 oıynnan soń 16 komandanyń arasynda 15-shi orynda turǵandyǵy. О́tken maýsymda «Ýfa» 6-oryn ıelenip, Eýropa lıgasynyń irikteý kezeńine qatysýǵa múmkindik alyp edi. 36 jastaǵy Sergeı Tomarov «Ýfaǵa» shilde aıynda kelgen bolatyn. Tomarov basshylyǵymen «Ýfa» premer-lıgadaǵy 13 oıynnyń tek ekeýinde ǵana jeńiske jetip, alty ret jeńiliske ushyraǵan. Bes oıynda qarsylastarymen teń túsken. Endi bas bapkerdiń mindetin atqarýshy bolyp reseılik burynǵy fýtbolshy Dmıtrıı Kırıchenko taǵaıyndaldy. Bálkim, osy jattyqtyrýshy Erkebulandy alaǵa jıi shyǵaryp, talantyn ushtaı túsetin shyǵar.

Jalpy, qazirgi tańda otandasymyzǵa alańǵa kóp shyǵyp, jıi dop tebý qajet. Jalyndap turǵan jastyq shaqta qosalqy quramda otyryp qalý onyń bolashaǵyna keri áserin tıgizetini belgili. Sondyqtan onyń Qazaqstannyń bir klýbyna oralǵany durys sııaqty. Biraq qazir Qazaqstan klýbtarynda da básekelestik joq emes. Mysaly, «Qaırat» sapynda Erkebulannyń pozısııasynda Andreı Arshavın, Ivo Ilıchevıch jáne Isael Barboza oınasa, al «Astana» komandasynda Marın Tomasov, Roman Murtazaev jáne Pedro Enrıke syndy fýtbolshylar bar. Eger, Seıdahmet osy aty atalǵan fýtbolshylarmen óz orny úshin básekelese alsa, onda Erkebulannyń bolashaǵy bar deýge tolyq negiz bola alady.

 

Talǵat MÚSIREPOV,

Blagodar mektebi

AQTО́BE

 

Sońǵy jańalyqtar

Ystyq tamaq taratty

Qazaqstan • Búgin, 17:59

Jaqsy ákim jalǵyz júredi

Tanym • Búgin, 17:02

Betperde kıgen kóktem

Tanym • Búgin, 16:55

Uqsas jańalyqtar