Elbasy tapsyrmasy boıynsha Qyzylorda oblysynyń ákimi Qyrymbek Kósherbaev aımaqta kóp balaly otbasylardan shyqqan talantty aýyl jastary úshin jyl saıyn 100 grant bóledi. Qazir jekemenshik oqý oryndarynyń kóbeıgendigi belgili. Biraq kóbiniń oqý bazasy, materıaldyq jaǵdaıy, oqytýshylar quramy, bilim deńgeıi búgingi bilim standarttaryna saı kelmeıdi.
Keıbireýlerde eki dıplomy bolsa da, bos jumys oryndary jármeńkesinde tıisti mamandyqtar boıynsha talap súzgisinen ótpeı júrgenderi sondyqtan. Elimizdegi keıbir joǵary oqý oryndarynyń múmkindigine senbegen jastardyń sheteldik oqý oryndaryn tańdap jatqandyǵyna Elbasy da keıistik bildirgen. Mundaıda tyǵyryqtan qalaı shyǵýǵa bolady?!
Qyzylorda oblysynda «Kásiptik bilim berý jáne bıznes: áriptester suhbaty» atty eńbek forýmynda oblys ákimi Q.Kósherbaev naryq jaǵdaıynda joǵary bilikti mamandar daıarlaýdaǵy talaptar jaıynda aıtqanda myna ózekti máseleni eske saldy.
– Sarapshylardyń baǵalaýy boıynsha, Batys Eýropa memleketterinde ishki jalpy ónimdi qalyptastyrýda adam kapıtalynyń úlesi – 30%, AQSh-ta – 40%, al TMD elderinde bar bolǵany 10-15%-dy quraıdy. Sondyqtan ekonomıkalyq ósim men barlyq ıgilikterdiń negizgi draıveri – adam, onyń bilimi men daǵdysy bolýy qajet. Adam jetekshi kúshke aınalýy kerek. Onyń bilimi, sheberligi, tájirıbesi – kóp jaǵdaıda tabysty istiń kepili. Nátıjesinde joǵary sapa men ekonomıkalyq ósý qamtamasyz etiledi, – dedi ol.
Adam kapıtaly bilim arqyly qalyptasady. Sondyqtan joǵary oqý ornyn bitirgenimen naryq jaǵdaıyna jaramaıtyn jastardyń qataryn kóbeıte bermeý úshin búginge kerek mamandyqtarǵa oqytý kerek. Memleketke salǵan adam ınvestısııasy degen sol.
– Biz 2014 jyldan bastap mektep bitirgen túlekterdi Máskeý men Sankt-Peterbýrgtiń eń úzdik tehnıkalyq joǵary oqý oryndaryna jiberýdemiz. Reseı Federasııasy Úkimetiniń granty negizinde oqyp jatqan 452 bilim alýshynyń Máskeý bolat jáne qorytpa ınstıtýty men Sankt-Peterbýrgtiń memlekettik ósimdik polımeri tehnologııalyq ýnıversıtetin bitirgen alǵashqy 32 stýdenti oqýyn aıaqtap elge oralsa, 42 túlek magıstratýrada bilimderin jalǵastyryp jatyr. Reseı joǵary oqý oryndarymen áriptestik baılanys nátıjesinde bıylǵy oqý jyly taǵy da 58 bala oqýǵa tústi, – deıdi aımaq basshysy.
Sonymen qatar jyl saıyn az qamtylǵan jáne kóp balaly otbasylardan shyqqan 100-ge jýyq daryndy bala oblys ákiminiń bilim berý granty boıynsha elimizdiń jetekshi joǵary oqý oryndaryna oqýǵa túsedi. Bıyl granttar sany 2 esege – 100-den 205-ke deıin artty. Bul rette granttardyń 70%-y IT-mamandyqtarǵa bólingen. Qyzylordalyq mektep bitirýshilerdiń 97%-y osymen eki jyl qatarynan joǵary jáne orta arnaýly oqý oryndaryna túsip otyr. Olardyń 57%-y memlekettik bilim grantynyń ıegerleri atandy. Bul ótken jylmen salystyrǵanda 509-ǵa artqan. Oblysta talapty jastarǵa osyndaı kómek kórsetilip otyr.
Baqtııar TAIJAN,
«Egemen Qazaqstan»
Qyzylorda oblysy
