Týysqan eki el arasyndaǵy tamyry tereń rýhanı dostyqty tý etken aıtýly sharaǵa Qazaqstan halqy Assambleıasy Tóraǵasynyń orynbasary – Hatshylyq meńgerýshisi L.Prokopenko, Parlament Májilisiniń depýtattary, QHA músheleri, memlekettik organdar, dıplomatııalyq korpýs, etnomádenı birlestikterdiń ókilderi, qoǵam jáne mádenıet qaıratkerleri qatysty.
Merekelik baǵdarlamada Túrkistan oblysy, Saıram aýdany oblystyq ózbek drama teatry ujymy L.Solovevtyń «Qojanasyr Saıramda» mýzykalyq komedııasynan úzindi oınasa, belgili estrada ánshisi Álisher Kárimov bastaǵan bir top ónerpaz kórermendi ózbek mádenıetiniń qyr-syrymen tanystyryp, án men bıden shashý shashty.
О́zbekstannyń Qazaqstandaǵy jyly – baýyrlas eki eldiń saıası, ekonomıkalyq, mádenı-rýhanı qarym-qatynasynyń damyp, nyǵaıa túsýine jańa serpin bergen eleýli oqıǵalardyń biri. Bul jóninde Memleket basshysy Nursultan Nazarbaev: «О́zbek halqy – bizdiń jaqyn kórshimiz. Ortalyq Azııadaǵy úlken memleketterdiń biri. Sondyqtan da О́zbekstanmen baılanys biz úshin qashanda mańyzdy» dep qos memleket arasyndaǵy saıası-ekonomıkalyq hám rýhanı dostyq baılanystyń mańyzdylyǵyna aıryqsha toqtalyp ótken bolatyn.
Osyǵan oraı, 2018 jyldyń maýsym aıynda Qazaqstan halqy Assambleıasy men О́zbekstan Respýblıkasy Mınıstrler Kabınetiniń janyndaǵy Etnosaralyq qatynastar jáne sheteldermen dostyq qarym-qatynas jónindegi komıteti arasynda memorandýmǵa qol qoıylyp, jarqyn ister júzege asyryla bastady. О́zbekstannyń Qazaqstandaǵy jylyn abyroımen eńsergen baýyrlas aǵaıyn 2019 jyly Qazaqstan mádenıetin óz elderinde keńinen nasıhattaıtyn bolady.
Nazerke JUMABAI,
«Egemen Qazaqstan»
