Kórmeniń ashylý saltanatynda sóz alǵan QR Ulttyq mýzeıi dırektorynyń orynbasary Abaı Satýbaldın: «Buǵan deıin atalǵan kórmeniń túrli toptamalar jınaǵyn kópshilik nazaryna usynǵan bolatynbyz. Kórikti Sınszıan týraly bul kórme toptamanyń altynshy bólimi bolyp tabylady. Sınszıan Qytaıdyń eń úlken aımaǵy. Tartymdy, aımaqtyń kelbeti kórkem, tabıǵı resýrstarǵa baı óńir. Búgingi kórmeden Sınszıannyń damý jolyn, túrli jetistikterin tamashalaýǵa bolady», - dedi.
Qytaı men Qazaqstan halyqtary arasyndaǵy baılanysty odan ári nyǵaıtý maqsatynda Qazaqstandaǵy Qytaı Elshiligi Qazaqstan Respýblıkasy Ulttyq mýzeıimen birlesip «Tańǵajaıyp Qytaı» fotokórmeler toptamasyn ótkizgen bolatyn. Bul shara atalǵan toptamanyń altynshy bólimi.
Qytaıdyń Qazaqstandaǵy Tótenshe jáne ókiletti Elshisi Chjan Sao: «Bul kórme «Tańǵajaıyp Qytaı» kórmeler toptamasynyń qorytyndy bólimi. Ár kórme Qytaıdyń túrli aımaqtaryna arnalǵan bolatyn. Sınszıan Qazaqstanǵa jaqyn ornalasqan. Bul aımaq eki el arasyndaǵy saıası-ekonomıkalyq qarym-qatynas barysynda mańyzdy ról atqarady. Kórmege usynylǵan fotosýretterde aımaqtyń túrli saladaǵy jetistikteri men ulttyq tarıhı-mádenı muralary, qorshaǵan ortany qorǵaýǵa baılanysty erekshelikteri berilip otyr», - dedi.
Sınszıan – Qytaıdyń eń úlken aımaǵy. Bul óńir kez kelgen kisini tamasha tabıǵatymen tarta túsedi. Kórmege Sınszıan aımaǵynyń jetken jetistikterin kórsetetin 100 fotosýret usynylyp otyr.
Kórme 2018 jylǵa 31 jeltoqsanǵa deıin jalǵasady.
Baǵashar TURSYNBAIULY,
«Egemen Qazaqstan»
