Kezinde jastar arasynda álem chempıony atanyp, bul kúnderi kásipqoı rıngti shaıqap júrgen qandasymyz óziniń altynshy kezdesýin ótkizgeli otyr. Buǵan deıingi básekeleriniń barlyǵynda ol aıqyn basymdyqpen aıaqtady. Sońǵy ret Sadrıddın sharshy alańǵa 25 qarashada shyǵyp, meksıkalyq Hose Fransısko Zýnıgany ekinshi raýndta uryp shyqqan edi.
Edmontonda Sadrıddın Ahmetov Meksıkanyń taǵy bir boksshysy Elıýd Melendez Rochamen aıqasady. 29 jastaǵy astekter eliniń ókili osyǵan deıin 26 kezdesý ótkizip, 14 ret jeńiske jetti. 9 qarsylasyn nokaýtqa jiberdi. 9 márte utylyp, eki básekeni teń aıaqtady.
Ǵalym SÚLEIMEN,
«Egemen Qazaqstan»
