Aleksandrdyń qarsylasy – Muhammed Rabıı. 25 jastaǵy Marrokanyń týmasy qazaqstandyq jankúıerlerge jaqsy tanys. 2013 jyly ol Almatyda ótken álem chempıonatyna qatysty. Osyndaı dúbirli dodada tuńǵysh ret baq synaǵan Muhammed tusaýkeser kezdesýinde Qyrǵystannyń boksshysy Erkinbek Bolatbekten utylyp, eline erte qaıtqan bolatyn.
Esesine 2015 jyly Dohada uıymdastyrylǵan álem chempıonatynda ol top jardy. Fınaldyq saıysta qandasymyz Danııar Eleýsinovke san soqtyrdy. Odan bólek, marrokalyq sportshynyń Afrıka chempıony jáne Olımpııa oıyndarynyń qola júldegeri degen ataqtary bar. Rıo de Janeırodaǵy jarystyń jartylaı fınalynda Rabıı ózbekstandyq Shahram Gııasovqa utyldy. Al ózbektiń óreni fınalda bizdiń Danııar Eleýsinovke ese jiberdi.
2007 jyly kásipqoı rıngke aýysqan Muhammed Rabıı osy kúnge deıin jeti jekpe-jek uıymdastyryp, barlyǵynda jeńiske jetti. Bes básekeni merziminen buryn aıaqtady. О́ziniń sońǵy kezdesýin ol ústimizdegi jyldyń 20 qazanynda avstrııalyq Gogı Knıazevıchke qarsy ótkizdi.
Aleksandr Jýravskııdiń kásipqoılar arasynda baq synap júrgenine 11 jyl boldy. Sol aralyqta 33 jastaǵy jerlesimiz 17 kezdesý ótkizip, 13 ret basymdyq tanytty. 11 qarsylasyn nokaýtpen utty. Ol da óziniń sońǵy jekpe-jegin qazan aıynda ótkizgen edi. О́kinshike qaraı, Jýravskıı ózbekstandyq Jasýr Ahmadjonoqa upaı sanymen utyldy.
Ǵalym SÚLEIMEN,
«Egemen Qazaqstan»
